АҞӘА, жәабран 10 – Sputnik. Урыстәылатәи атуристка Елена Федотова лыԥшаара ишаҿыц иаҿуп ҳәа Sputnik иазеиҭарҳәеит Аԥсны Аҩнуҵҟатәи аусқәа рминистрраҟны.
"Аԥшааратә операциа шцац ицоит. Аҩнуҵҟатәи аусқәа рминистр хаҭала хылаԥшра аиҭоит", - ҳәа рҳәеит аусбарҭаҿы.
Елена Федотова ажьырныҳәа 17 ауха дыӡит ҳәа Гагра араион ААР аҷаԥшьаратә хәҭахьы адырҩаҽны адырра ҟарҵеит. Азинхьчаратә усбарҭахь арзаҳал налгеит Федотова лҩыза - Марина Бофанова.
Ажьырныҳәа 26 2021 шықәсазы Гагра араион апрокуратура абри ахҭыс аганахьала ашьаусҭҵаара хацнаркит Аԥсны АЗ ахәҭаҷ 99 ахәҭа 1 ала (гәҭакрыла ауаҩшьра).
Иахьатәи аамҭазы иахәҭаны иҟоу ашьаусҭҵааратәии аоперативтәи уснагӡатәқәа мҩаԥыргоит аԥҳәыс лыԥшааразы.
