Цәыббра 28-29 рзы Аҟәа атранспорт аныҟәараз аԥкрақәа ҟалоит
© Sputnik / Акоп Кущян
Анапаҵаҩра
Аҟәа атранспорт аныҟәараз аԥкрақәа рыдыркылеит ахада ихаҭыԥуаҩ Бадра Гәынбеи амчратә структурақәа рхаҭарнакцәеи, Аҟәа ахада Беслан Ешбеи реилацәажәараҟны.
АҞӘА, цәыббра 22 - Sputnik. Цәыббра 28-29 рзы Аҟәа амҩаду хадақәа рҿы атранспорт аныҟәараз аԥкрақәа ҟалоит ҳәа аанацҳауеит ахада ипресс-маҵзура.
Асааҭ 06:00 - 13:00 рзы Ахақәиҭра ашҭа, Арӡынба, Гәлиа, Басариа, Ӡиӡариа, Дбар, Пушкин, Аидгылара амҩақәа, Аиааира амҩаду ахәҭак, Пушкин имҩаҟынтә Ҷоҷуа имҩаҟынӡа аркхоит.
Арҭ амшқәа рзы еиҿкаахоит амашьынаргыларҭақәа Аҟәатәи аихамҩатә станциа, Кьалашәыртәи аихамҩатә станциа рҿаԥхьатәи ашҭақәа рҿы. Иара убасгьы ауаажәларратә транспорт амаршрут цҵақәа еиҿкаахоит.
