Аԥсны иаанкылоуп урыстәыла аҩнуҵҟатәи атәылауаҩшәҟәқәеи аныҟәцаратә зини рыҭара
12:37 06.02.2026 (ирҿыцуп: 13:00 06.02.2026)
© Sputnik / Нина Зотина
Анапаҵаҩра
АҞӘА, жәабран 6 — Sputnik. Аԥсны иахьаҵанакуа Урыстәыла атәылауаҩра змоу Аԥсны атәылауаа урыстәылатәи аҩнуҵҟатәи атәылауаҩшәҟәқәеи аныҟәцаратә зини ахьрырҭо аҭыԥқәа русура аанкылоуп ҳәа аҳәамҭа ҟарҵеит Аԥсны иҟоу Урыстәыла Ацҳаражәҳәарҭаҿы.
"Аԥснытәи аполитикатә усзуҩцәа, Жәлар Реизара адепутатцәагьы налаҵаны, зыӡбахә ҳәоу аҭыԥқәа русура азакәаншьаҭа амазааразы ргәыҩбараз, ихьыԥшым Аԥсны аҳәынҭқарра асуверенитет ҳаҭырла иазнеиуа урыстәылатәи аган урҭ аҭыԥқәа русура аанкыларазы аӡбамҭа рыдыркылар акәхеит", — ҳәа азгәаҭоуп аҳәамҭаҿы.
Аԥсны атәылауаа иарбоу аусшәҟәқәа рыҭаразы аусура Урыстәыла аҵакырахь ииагахоит ҳәа азгәарҭеит Ацҳаражәҳәарҭаҿы.
