Есма Ҭодуаԥҳа, Sputnik
Аԥсны уажәааны ҽаҩраҭагалара иасакьаҳәымҭоуп, ҭагалан аԥштәы – ари еинҭәылоу ажьымжәа аԥштәы ауп, иҟаԥшьыуаркалеиуа амыҵмыџь, ипатырқалԥштәу аҟаб, ахәырма уҳәа зеиуахк уҭаху шәырԥштәыла иҩычоуп. Бзиа излаумбари ақыҭа ари аамҭазы, еиуеиԥшым ашәырхкқәа рыфҩы хаа аҳауа илаҳалаҳауа ианалоу.
Ақыҭақәа рҿы ари аамҭазы анхаҩы иусура еилашуеит: аџьықәреи аҭагалара, ажьҭаара, арасаҟәшәара, амандарин аҿыхра уҳәа. Ажәакала, илауҵаз ауп иааурыхуа. Ҳәарада ари аус иацуп аџьабаа маҷымкәа, аха уџьабаа ануԥыло еиҳау гәырӷьарас иҟоу арбану.
Анхацәа ишазгәарҭо ала, сынтәа аҽаҩра еиҳа еиӷьуп ҵыԥх аасҭа. Ҵыԥх ицәырҵны иҟаз ахәаҷа-маҷақәа аарыхрақәеи шәыри-қәыри ирырҭаз аԥхасҭа рацәан. Сынтәа уи аганахьала иаҳа еиӷьхеит, уи изаамҭанытәины имҩаԥгаз ахәышәтәрақәагьы ирыбзоурахеит ҳәа рҳәоит дара.
Анхаҩы адгьыл иазыҟазаашьа аадырԥшуеит уи иазкны имҩаԥиго аныҳәарақәагьы. Ҭагалан азы имҩаԥырго амзартә ныҳәарақәа шамахамзар адгьылқәаарыхра ирыдҳәалоуп. Адгьылқәаарыхра ианалагоз ааԥын азы рҽаҩра беиахарц азы аныҳәарақәа мҩаԥыргозҭгьы, ҽаҩраҭагалара анҵәамҭазы иҭаргалаз рҽаҩра иақәныҳәоит иаадрыхыз ала аишәа рхианы.
Алаҳарҩа, аџьынџьыхәа, ахәырмарҩа, ақалмышь Аԥсны асасцәагьы бзиа еицырбахьоу амилаҭтә аалыҵқәа иреиуоуп. Анхаҩы иаалыҵқәа аџьармыкьахь рцәыргара макьанагьы инагӡаны иӡбам ихадароу зҵаараны иаанхоит.
Амилаҭтә аалыҵқәа брендк раҳасабала рцәыргара априоритеттә зҵаарақәа иреиуоуп. Уимоу уажәы иҟоу аҿкы чымазара COVID-19 ицәырнаго акризистә ҭагылазаашьаҿы амилаҭтә аалыҵқәа аҩнуҵҟатәи аҭагылазаашьа аиӷьтәразы ицхыраагӡахар ҟалоит.
Иара убас шәаԥхьар ҟалоит:
-
Ақалақь аҿы акәу, ақыҭаҿы акәу: акарантин ахгара иаҳа иахьыманшәалоу
-
Жәлар рҳәамҭақәа бренд ҳасабла: аԥсуа колорит ақалақьтә субкультураҿы ацәыргара
-
Аамҭақәа зегьы ирзыхиоу: Бабышьира инхо Наҭелла Џьынџьал лнапы шлыцааиуа
