АҞӘА, хәажәкыра 2 – Sputnik. Шәача ақалақь аҟны даанкылан 28-шықәса зхыҵуа Аԥсны атәылауаҩ. Иара дангәарҭа идырбалеит 20 рҟынӡа еилаҳәара, иҭҵаамыз илагоу амаҭәашьар згәылаз. Абри атәы аанацҳауеит Краснодартәи атәылаҿацә аҩныҵҟатәи аусқәа русбарҭа апресс-маҵзура асаит.
"Иаанкылаз ахаҵа идбалан 20 рҟынӡа еилаҳәара, иҭҵаамыз илагоу амаҭәашьар згәылаз. Аҽа ԥшь-еилаҳәарак ақалақь иахьаҵанакуа аҭыԥ маӡақәа рҟны иҵәахын. Иԥшааз зегьы аҭҵаарҭахь инашьҭын", — ҳәа аҳәоит асаит аҟны.
Имҩаԥгаз аекспертиза ишьақәнарӷәӷәеит аилаҳәарақәа иргәылаԥсаз амаҭәашьар анаркотикатә маҭәашьар, героин шакәыз. Иара акапан 17 грамм инаӡон.
"Иаанкылаз ахаҵа аполициа рҟны иҿы иқәшаҳаҭхеит, иҳәеит аинтернеттә ҳаҿы наркокуриерс аҟалара алзыршоз асаит шиԥшааз", —ҳәа аҳәоит асаит.
Урыстәыла иахьаҵанакуа анаркотикатә маҭәашьарқәа рылаирҵәоит ҳәа агәаанагара зызроуз Аԥсны атәылауаҩ ҭакрыла жәашықәса рҟынӡа ахгара иқәшәар алшоит ҳәа аанацҳауеит Краснодартәи атәылаҿацә аҩныҵҟатәи аусқәа русбарҭа апресс-маҵзура.
