АҞӘА, цәыббра 29 — Бадраҟ Аҩӡба. Ахьӡ-аԥша амузеи аҟны аҩаша, цәыббра 29 рзы иаадыртит ацәыргақәҵа "Аҳәса аибашьраҟны".
"Аибашьра ҳгәашә ианҭала аҳәсагьы ахацәа инарывагыланы иқәгылеит. Рыжәҩа иқәырхит аибашьра иацыз ауадаҩрақәа зегьы. Убри азоуп еиҳаракгьы изаҳҭаху аибашьра адәаҟны иҭахази аибашьра ашьҭахьтәи аҭынчаамҭазы зыԥсҭазаара иалҵызи ргәаларшәара", — лҳәеит Владислав Арӡынба ихьӡ зху Ахьӡ-аԥша амузеи адиректор, Аԥсны Афырхаҵа Мзиа Беиаԥҳа.
Ацәыргақәҵаҟны иқәыргылоуп аибашьраҟны иҭахаз рфотосахьақәа, авидеориад, аслаид-шоу.
"Аматериалқәа ирныԥшуеит аҳәса аибашьра разыҟазаашьа. Аҳәса аԥсҭазаара ахьӡала ифырԥҳәысцәаны рхы аадырԥшит", — азгәалҭеит Беиаԥҳа.
Ацәыргақәҵа еиҿыркааит Рамин Қаџьаиа, Маиа Амҷыԥҳа, Марина Барцыцԥҳа, Баҭал Кәабахьиа, Олег Климов рҭыхымҭақәа рыла.
"Сара исыцәҭахеит аишьцәа ҩыџьеи аиҳәшьцәа ҩыџьеи. Саҳәшьа Раиса Аԥсны Афырхаҵа ҳәа ахьӡ ԥшьа лыхҵоуп. Сгәы ҟанаҵоит ахацәа ирывагыланы еибашьуаз ҳаӡӷабцәа ахьыргәалашәо. Даара исцәыуадаҩуп аибашьра адәаҟны ҳаҳәса ирхыргаз атәы аиҭаҳәара", — лҳәеит Ира Кәыркьба.
1992-1993 шықәсқәа рзтәи Аԥсны жәлар Рџьынџьтәылатә еибашьра иалахәын шәҩык инареиҳаны аҳәса. Ҩеижәаҩык аибашьра адәаҟны иҭахеит, ԥшьҩык – 1994 шықәсазы, рнапынҵақәа рынагӡараан, ҩеижәаҩык аибашьра ашьҭахьтәи аамҭақәа рзы.
