АҞӘА, абҵара 13 — Sputnik. Асҭанда Арӡынԥҳа. Аԥсны Апрокурор хада ихаҭыԥуаҩ Омиани Логәуа напхгара аиҭоит Аҟәа ақалақь аҭыԥ зауз Роман Инаԥҳаи Енвер Агрбеи рышьра иадҳәалоу ашьаус аҭҵаара ҳәа аанацҳауеит Аԥсны Аҩныҵҟатәи аусқәа рминистрра аофициалтә саит.
1982 шықәса рзы ииз Роман Инаԥҳаи 1983 шықәса рзы ииз Енвер Агрбеи рышьра афакт инадҳәаланы ашьаусҭҵаара хацыркуп ахәҭаҷқәа ҩба: ҩ-хаҿыки инареиҳани хықәкыла рышьреи абџьар закәантә ҵаҵӷәыда аахәареи, аҵәахреи, аныҟәгареи инарықәыршәаны.
Уаанӡа иазгәаҭан аԥшьаша, абҵара 12 2015 шықәса рзы Аҟәа ақалақь аҟны асааҭ 19.30 рзы ажәытәтәи Совмин ахыбрақәа рзааигәара ирбаз автомашьына BMWX5 (А563ОМ) дҭан ахәра рацәа змаз Инаԥҳа Роман ҳәа.
Иара Ареспубликатә хәышәтәырҭаҟны даннарга ашьҭахь иԥсҭазаара далҵит. Иара убасгьы амашьына иацәыхарамкәа ирбеит ахәра рацәа змаз Енвер Агрба иԥсыбаҩ ҳәа аанацҳауеит Аԥсны Аҩныҵҟатәи аусқәа рминистрра аофициалтә саит.
