АҞӘА, жәабран 16 — Sputnik, Сырма Ашәԥҳа. Ауаажәларратә еиҿкаара "Жәларбжьаратәи афонд Аԥсны", имҩаԥнаго аусхкқәа ируакуп изызҳауа ахәыҷқәа ирызку апроектқәа рыдгылара, рҵарадырра аизырҳара, аԥсуа бызшәа анырра рыҭара, агәыбылра рылааӡара, аԥсҭазаара аԥҟара иашақәа рықәныҟәара.
Сонер Гогәуа напхгара зиҭо, "Жәларбжьаратәи афонд Аԥсны" спонсор хадас иамоуп жәабран алагамҭазы, Абаза телехәаԥшрала аефир ахь иҭыҵыз ахәыҷтәы дырраҭара "Мрашҭа". Ари адырраҭара иадыԥхьалоуп, зхатәы бызшәала ицәажәо, еиуеиԥшым арубрикақәа мҩаԥызго ахәыҷқәа рацәаҩны. "Мрашҭа" аефирахь иҭыҵуеит мызкахьы ҩынтә.
Адырраҭара автор — Фаина Матуаԥҳа, арежиссиор — Виола Кәакәасқьырԥҳа, аоператор — Сасрыҟәа Агәхаа, анапхгаҩы — Руслан Ҳашыг.
"Зегь раԥхьа иргыланы хықәкыс иҳамоуп, ахәыҷқәа аԥсуа бызшәа агәыбылра дыркра, ҳатрадициақәа рылааӡара. Уи маҷк иадымхаргьы, дара рҟынӡа иҳазнагар, ҳара ҳзы иааирак иаҩызоуп. Ҳдырраҭара иадҳаԥхьалоит заԥсшәа ԥсыҽу ахәыҷқәагьы. Убри ала, урҭ рхатәы бызшәахь ирымоу агәцаракра еизҳауеит ҳәа ҳгәы иаанагоит. Дара адырраҭарахь иааҳаԥхьанӡа, аус рыдаҳулоит, арубрикақәа мҩаԥыргартә еиԥш, уи азы раԥхьатәи ашьаҿақәа дҳарҟаҵоит", — ҳәа азгәалҭоит адырраҭара автор Фаина Матуаԥҳа.
"Жәларбжьаратәи афонд Аԥсны" ахаҭарнакцәа, ахәыҷтәы дырраҭара "Мрашҭа", ахәыҷқәа рдунеи аҳәаақәа рырҭбаараҿы аихьӡарақәеи, аманшәалареи рзеиӷьанашьоит!
