АҞӘА, мшаԥымза 8 — Sputnik, Роберт Џьапуа. Аԥсны Ахада Рауль Ҳаџьымба Пицунда имҩаԥысуа аргыларақәа ргәаҭаразы даҭааит. Иара агәра хеиҵоит урҭ аԥхынтәи асезон алагамҭанӡа ихыркәшахап ҳәа. Ареспубликатә унитартә наплакы "Акурорт Пицунда апансионатқәа реидгыла" адиректор Даур Кәырмазиа иазгәеиҭеит аргыларақәа ахыркәшарахь ишнеиуа атәы.
"Акорпусқәа быжьба рҟынтәи ԥшьба – "Бзыбь", "Золотое руно", "Колхида" "Амра" рҟны ииасыз ашықәс, ԥхынҷкәынмзазы аремонттә усурақәа ирылаган. Акапиталтә ремонт ҳаҿуп. Аномерқәа ҳаамҭа иақәшәо аҭагылазаашьа рыҭатәуп. Аргыларатә усурақәа ахыркәшарахь инеиуеит", — иҳәеит иара.
"Акурорт зеиԥшраз здыруаз рзы иахьа иузымдыруа иҟалашт. Иахьа номер цыԥхьаӡа рхатәы ҽыкәабарҭақәеи ашьышьмақәеи рымоуп. Зегьы еиҭакуп уажәы имҩаԥысуа аусурақәа акурорт аҳаҭыр еиздырҳараны иҟоуп", — иҳәеит атәыла Ахада.
Ареспубликатә унитартә наплакы "Акурорт Пицунда апансионатқәа реидгыла" адиректор Даур Кәырмазиа иажәақәа рыла иаанхаз акорпусқәа "Апсны", "Амза", "Маиак" – еиҳа идуу корпусқәоуп. Урҭ рҟны акапиталтә ремонт изаламгеит, аха аиҭарҿыцратә усурақәа ирҿуп.
