АҞӘА, мшаԥымза 22 — Sputnik, Сырма Ашәԥҳа. Ишдыру еиԥш, Аԥсны Аџьынџьтәылатә еибашьра ианалага, рҭоурыхтә ԥсадгьыл ахьчара иааит ҳџьынџьуаа. Иҟоуп урҭ рахьтә Аиааира абара иахьымӡакәа иҭахақәаз. Иҟоуп ара зынхара ҟалазгьы.
Убас еиԥш, аибашьра анцоз аамҭазы, иҟан Ҭырқәтәылантә Аԥсныҟа иаауаз аиҳабацәа. Урҭ изларылшоз ала аматериалтә цхыраара, адгылара ҟарҵон. Орҳан Шамба Ҭырқәтәылантә Аԥсныҟа иааз раԥхьаӡатәи адиаспора ргәыԥ далахәын. Абар иара ицәажәара:
"Ажәлар шәхаҵкы сцааит. Ҵабыргуп абра ҳааидыжәгалеит, аизара ҳзеиҿышәкааит Аԥснаа. Хаицәажәап, ҳгәаанагарақәа еибаҳҳәап. Сара акрааҵуеит Аԥсныҟа смааижьҭеи. Сгәы бааԥсын сзымааӡеит, цәгьа игәхьаазгон. Аԥсназы иуҳәаша рацәоуп. Сразҟы иалан Аԥсны раԥхьаӡа 1975 шықәса азы абара.
Усҟан гәыԥҩык Ҭырқәтәылантәи иаақәаз аԥсуаа ҳаҟан. Сыԥсадгьыл сыла ианаба, саналаԥш-аалаԥш ауп ианеилыскаа, ҳара ҳзыхдырҟьоз. Хаԥсны аԥшӡароуп ҳазхырбаауаз, иахьагьы ҳаӷацәа ҳзыхдырҟьо убри ауп. Ҳарҭ аамҭа бзиак ҳзааины, ҳаиҭанаиааиуа ҳҟалар, ҳаибабарагьы, ҳгәыбылрагьы, ҳусқәагьы маншәалахон.
Аха, иахьа уажәраанӡа ҳабацәа рабацәа аҵамхаӡеит. Абыржәыраанӡа ҳадгьыл хьчаны иаҳзааргеит, ари нахысгьы еиқәҳархароуп. Ҳара уа ҳахьыҟоу иҳаҳауаз ажәабжьқәа ҳгәы анкарыжьуаз ыҟан, зны-зынлагьы ҳгәы арӷәӷәон. Уажәтәи аибашьра иахҟьаны, Ҭырқәтәыла ҳаззымдыруазгьы ҳардырит.
Аҳәынҭқарратә ҩаӡара аҟынӡа инеҩит ҳаӡбахә. Аҭырқәа идгьыл аҿы мацара акәым, адунеи ахьынӡанаӡааӡо аԥсуа дыззымдыруа уаҩ дыҟам. Убри алагьы ҳара ҳгәы дууп. Иахьа абра ҳахьааизгьы, ҳахьшәылаԥшуа ҳгәы еизҳаны ҳаҟоуп.
Ҳгәы дуны ҳзыҟоу, аамҭа уадаҩ ишҭагылоугьы, ҳаазазҵаауа зегьы ргәы каҳан иҟаӡам. Уи аԥсуа иҟазшьа аҷыдарақәа иреиуоуп. Ҳаргьы ҳаара зызку, гәырԥынҵак аҟара акәзаргьы шәгәы ҳардуур, шәгәы аӷәӷәара ҳзацҵар, гәахәа алаҳхуеит.
Аԥсуаа, аӡә дҳагәҭасыр ҳауӡом. Иҟаҳцашақәа акырӡа ирацәоуп. Ацхыраара хәыҷы ишәзыҟаҳҵо ҭабуп ахышәҳәаауеит. Ус ҟалома? Ҳара ҳаишьцәоуп, ҳаидгылароуп, ҳажәҩахыр еибаҳҭароуп. Аԥсны ахьымӡӷ иаҵаҳамҵароуп. Ак ҳалшоны ҳаҟазар, ҳаззегьы ҳаидгылароуп.
Аԥснынтә Ҭырқәтәылаҟа ҳаныхынҳәлак, иаҳбаз-иҳаҳаз рзеиҭаҳҳәоит. Шәгәы кашәмыжьын, абааԥсы, ҳаԥсадгьыл ахьчаҩцәа! Ҳара аҭаҳмадцәа иҟаҳҵаран иҟоузеи, аха иахьынӡаҳалшо ҳшәывагылоуп, шәызҵоу ахьанҭара шәыцеиҩаҳшоит. Аԥсны абарақьаҭра, аџьанаҭра ҳаӷрамгылап. Зыԥсадгьыл ахьчара зхы ақәызҵаз ҳрызхәыцып. Иҳалымшаша ҳалҳаршап. Ҳаи, шьыри сыԥсадгьыл ахьӡала сыԥсындаз, џьанаҭ сымцоз"!..
