АҞӘА, лаҵарамза 24 – Sputnik, Саид Барганџьиа. Аҳҭнықалақь астадион "Динамои" Даур Ахвледиани ихьӡ зху Гагратәи астадиони ConIFA адунеи ачемпионат амҩаԥгара ишазырхиоу атәы ҳкорреспондент изеиҭарҳәеит Аҳәынҭеилакы "Аԥсныргылара" ахаҭарнакцәа.
Аҳәынҭеилакы "Аԥсныргылара" аҟәша "Аҟәаргылара" адиректор Гурам Ҳаразиа иажәақәа рыла астадион "Динамо" аҟны аусурақәа хыркәшоуп.
"Астадион ачемпионат иазырхиоуп", — иҳәеит иара.
Аҳәынҭеилакы "Аԥсныргылара" аҟәша "Гаграргылара" адиректор Нодар Хәарцкьиа иакәзар иазгәеиҭеит Даур Ахвлидиани ихьӡ зху Гагратәи астадиони ConIFA адунеи ачемпионат амҩаԥгара ишазырхиоу атәы.
"Рацәак ибыргәым аусурақәа мҩаԥаагоит. Егьыс астадион асасцәа ишахәҭоу еиԥш иаднакылартә иҟоуп", — иҳәеит иара.
FIFA иалам амилаҭтә командақәа рыбжьара ConIFA ашьапылампылтә чемпионат азы ирҭираны иҟоу абилеҭқәа рзеиԥш хыԥхьаӡара 85 000 цыра ыҟоуп.
Лаҵарамза 28 рзы ачемпионат аартхоит. Лаҵарамза 29 рзы иалагоит ахәмаррақәа. Ахәмаррақәа мҩаԥысраны иҟоуп аҳҭнықалақь астадион "Динамо" аҟны. Мышкы ала имҩаԥысраны иҟоуп ахәмаррақәа ԥшьба. Рашәарамза 5 рзы афиналтә матч мҩаԥгахоит. Аицлабрақәа рҟны аиааира згаз акомандақәа аԥхьахәқәа ранашьара ацеремониа мҩаԥысуеит рашәарамза 6 рзы, ачемпионат алахәылацәа рыҩныҟақәа рыхынҳәра амшаз.
ConIFA Анагӡаратә еилакы аилатәараҟны, 2015 шықәса ԥхынгәы 8 рзы, еицҿакны рыбжьы рҭиит 2016 шықәса рзы адунеитә Чемпионат Аԥсны имҩаԥысырц.
