Ашьапылампыласҩы Исмаил Фераси амузыкант Барас Кәыџбеи ирыдныҳәалеит

© Sputnik, Бадраҟ АҩӡбаАрепатриациа.
Арепатриациа. - Sputnik Аҧсны
Анапаҵаҩра
Yandex newsTelegram
Аиԥылара ашҟа имҩахыҵит, зыԥсадгьыл ашҟа ихынҳәыз ҳџьынџьуаа, аҵарауаа, ауаажәларратә усзуаҩцәа.

АҞӘА, рашәарамза 16 – Sputnik, Бадраҟ Аҩӡба. Зыԥсадгьыл ашҟа ихынҳәыз ҳџьынџьуаа Аԥсны ашьапылапыл асразы еизгоу акоманда ахәмарҩы Исмаил Фераси, амузыкарҳәаҩ қәыԥш Барас Кәыџбеи рнапы злаку аусқәа рҿы иаадырԥшыз аихьӡара дуқәа рыдырныҳәаларц урҭ иахьа инарыԥхьеит Аԥсадгьыл ашҟа архынҳәразы аҳәынҭқарратә еилакы ахыбра ашҟа.

Исмаил Ферас шьҭрала дадыгоуп, уи Аԥсныҟа нхара ҳәа дааит Шьамтәылантәи 2015 шықәсазы, иара дхәыҷаахыс ашьапылампыл дасуан, бзиа ибон. Аԥсныҟа данаа лҵшәабзиала ихәмарразы уи ареспублика еизгоу акоманда далалоит.

"Афиналтә хәмарра ашҟа сахьзымнеиз даараӡа сгәы иалоуп, аха агәыӷра сымоуп ԥхьаҟа Аԥсны акомандазы еиҳау аихьӡарақәа рышҟа ҳнеип ҳәа. Сара иаҳа сықәра анмаҷыз арахь саар сҭахын, аха уажәраанӡа саартә еиԥш изыҟамлеит", — иҳәеит ашьапылампыл асразы адунеи ачемпион Исмаил Ферас.

Ахәылԥаз аҟны иқәгылеит Аҟәатәи аҵаралашаратә ҵараиурҭа аҵаҩцәа, урҭ аҿарпын аҿы ихәмарит, адаулқәа рыла иадырҳәеит амилаҭтә ритмқәа.

Арепатриациа. - Sputnik Аҧсны
Аԥсуа-адыга диаспора ркультуреи рлитературеи ирызкыз ахәылԥаз мҩаԥысит

Барас Кәыџба Аҟәатәи амузыкатә ҵараиурҭа аҟны актәи акурс аҿы дтәоуп, уи ааигәа Москватәи Кремль аҟны имҩаԥысуаз амузыкатә фестиваль далахәын. Аиԥылара иалахәыз аӡәырҩы иазгәарҭеит зыԥсадгьыл ашҟа ихынҳәыз ҳџьынџьуаа рҟазаратә еизҳара Аԥсны зегь ахьыӡ шыҭнаго, урҭ рылша шырацәоу ҳтәыла аӡбахә бзианы ирҳәаларц азы.

"Ҩажәихәба шықәса раԥхьа Аԥсныҟа ҳанаауаз ҳгәы иаанагон иҳалшару ҳәа Аԥсны анхара. Уажәы абарҭ ахәыҷқәа сахьрыхәаԥшуа ҳагәҭакы наӡазшәа збоит, ҳахәҷқәа зҳаит, Аԥсны ахьыӡ ҭырго иалагеит. Ферас иара ихала иҭаацәа иманы арахь дааит, ашьапылампыл асразы афиналтә хәмарра анцоз агәыр илаҵаны ддырхәмарыр акәын ишьапы ахьаа шамазгьы. Аха убри амш аҽны иаб иԥсҭазаара дшалҵыз иаҳаит, убри азы ахәмаррахьы дзымнеиӡеит, аха усгьы "Ахьӡ-Аԥша" змоу акоманда далахәуп", — иҳәеит Аԥсадгьыл ашҟа архынҳәразы аҳәынҭқарратә еилакы аҟны аус зуа Ерқан Қәҭарба.

Аиԥылара ахыркәшамҭазы аилак ахьӡала Исмаил Фераси Барас Кәыџбеи аҳамҭақәа ранаршьеит.

 

Ажәабжьқәа зегьы
0