АҞӘА, ԥхынгәы 15 – Sputnik, Бадраҟ Аҩӡба. Аԥсны Акурортқәеи атуризми рзы аминистр ихаҭыԥуаҩ Асҭамыр Ахба адырра ҳаиҭеит уажәазы Аԥсныҟа иаахьо атуристцәа рхыԥхьаӡара ҵыԥх уажәааны иадукылар шалшо. Урҭ рхыԥхьаӡара 300 000-ҩык рҟынӡа инаӡоит.
"100 000-ҩык рҟынӡа асасааирҭақәеи аԥсшьарҭа ҩынқәеи рҟны рыԥсы ршьахьеит. 200 000-ҩык рҟынӡа екскурсиа ҳасабла Аԥсны иаҭаахьеит", — иҳәеит Аԥсны Акурортқәеи атуризми рзы аминистр ихаҭыԥуаҩ Асҭамыр Ахба.
Иара иазгәеиҭеит 2015 шықәса рзы атәыла ишаҭааз миллионк инареиҳаны аԥсшьаҩцәа. Иҳәеит сынтәагьы агәыӷра шимоу усеиԥш иҟалап ҳәа.
Ахба иажәақәа рыла асезон иасакьаҳәымҭаны ишьоу нанҳәамзоуп.
