АҞӘА, нанҳәа 31 – Sputnik, Роберт Џьапуа. Аԥсны Ахада Рауль Ҳаџьымба игәҭакуп усутә визитла Ҟарачы-Черқьесски Ҟабарда-Балкариеи рҭаара нанҳәа 31 инаркны цәыббра 1 азынӡа. Абри атәы аанацҳауеит атәыла Ахада иофициалтә саит.
"Авизит аҳәаақәа ирҭагӡаны Ҟарачы-Черқьесск Рауль Ҳаџьымба ихы алаирхәуеит Аԥсны Аҳәынҭқарра ахақәиҭреи ахьыԥшымреи зхы ақәызҵаз рбаҟа аартра", ҳәа арбоуп асаит аҟны.
Иара убасгьы авизит аан иазыԥхьагәаҭоуп ареспублика ахада Рашид Темрезов, хатәгәаԥхарала Аԥсны иааны еибашьуаз, абаза уаажәларратә еидгыла "Аԥсадгьыл" Ассоциациа алахәылацәа рԥылара.
Рауль Ҳаџьымба иара убасгьы даҭаараны дыҟоуп Ҟабарда-балкариатәи ареспублика, дрылахәхараны дыҟоуп Ҟабарда-Балкариа аҳәынҭқарра 95-шықәса ахыҵра иадҳәалоу аныҳәатә уснагӡатәқәа.
Иныҟәараан Рауль Ҳаџьымба дымҩаԥыргоит атәыла Ахада Иусбарҭа анапхгаҩы инапынҵақәа назыгӡо Дмитри Шамбеи Аԥсны Ашәарҭадаратә хеилак амаӡаныҟәгаҩ Муҳамед Кьылба.
