АҞӘА, жьҭаара 26 – Sputnik, Роберт Џьопуа. Аԥснытәи аерманцәа ареспублика ауаажәларра-политикатә ԥсҭазаара инарҭбааны иалахәуп, иҳәеит Апарламент адепутат Левон Галустиан, авидеоцҳа Ереван-Аҟәа аформат иҭагӡаны имҩаԥысыз апресс-конференциаҟны. Апресс-конференциа иалахәын ареспублика аерман обшьчина ахаҭарнакцәа.
Аԥсны аерманцәа Рхеилак ахантәаҩы Галуст Трапизониан иҳәеит: "Аԥснытәи аерманцәа ареспублика ауаажәларра-политикатә ԥсҭазаара инарҭбааны иалахәуп, урҭ аԥснытәи ауаажәларратә еилазаара иахәҭакуп. Ҳара агәахәара ҳнаҭоит ара ҳанхо-ҳанҵуа ҳахьыҟоу" ҳәа.
Трапизониан иазгәеиҭеит Аԥснытәи ашколқәа рҟны ишыҟоу аерман хәыҷқәа рбызшәа рҵартә еиԥш аҭагылазаашьа.
"Аԥсны иҟоуп аерман школқәа 27. Арҵагашәҟәқәа Ермантәылантәи иҳауеит. Сынтәа, раԥхьаӡа акәны ААУ аҿы апедагогикатә факультет аҿы аҵара иалагеит ԥхьаҟа аерман школқәа рҟны аус зуша астудентцәа", — иҳәеит Трапизониан.
Аԥснытәи аерманцәа ареспублика ауаажәларра-политикатә ԥсҭазаара инарҭбааны иалахәуп иҳәеит Апарламент адепутат Левон Галустиан Ермантәылатәи ажурналистцәа рызҵаарақәа рҭак ҟаҵо.
Галустиан иазгәеиҭеит дышгәыӷуа иаарласны Ермантәылагьы официалла Аԥсны ахьыԥшымра азхазҵаз атәылақәа ируакхап ҳәа.
"Ермантәылагьы официалла Аԥсны ахьыԥшымра азхазҵаз атәылақәа ируакхап ҳәа уи иацу ауадаҩрақәа шеилаҳкаауагьы", — иҳәеит адепутат.
Авидеоцҳа Ереван-Аҟәа аформат иҭагӡаны имҩаԥысыз апресс-конференциа сааҭк иназынаԥшуа ицон. Ауснагӡатә иалахәын Аԥсны Ауаажәларратә палата алахәыла Хачик Миносиани Апарламент аиҳабы ихаҭыԥуаҩ Вагаршак Косиани.
