АҞӘА, ԥхынҷкәын 21 — Sputnik, Бадри Есиава. 2017 шықәса, ажьырныҳәа 1 инаркны аҳәынҭқарратә медицинатә усҳәарҭақәа ҩба рнапхгара реидбалара азин ҟалом иҳәеит ԥхынҷкәын 21 рзы имҩаԥысуаз аминистрра инарҭбаау аколлегиаҟны Андзор Гоов.
"Агәабзиарахьчаратә усҳәарҭа анапхгаҩыс дҟалар алшом ахаҿы, аҽа усҳәарҭак аҟны анапхгара знапы иану. Ажьырныҳәа инаркны агәабзиарахьчаразы азакәан инақәыршәаны аусқәа рҭыԥ иқәҵатәуп", — иҳәеит Гоов.
Аԥсны Агәабзиарахьчара аминистр ихаҭыԥуаҩ Баҭал Кациа иҳәеит азакәан ҿыц ахәҭаҷқәеи апунктқәеи абри адагьы ишазыԥхьагәарҭо аҩныҵҟатәии адәныҟатәии ус еидбалара 1,5 зыԥҵәа еиҳамхароуп ҳәа.
"Амедицинатә усзуҩцәа ажьырныҳәа 1 инаркны, 1,5 зыԥҵәа еиҳаны аидбалара азин роуам. Ҳусуҩцәа рулафахәы амаҷра иахҟьаны ҩыџьара, хыџьара аус руеит. 2017 шықәса ажьырныҳәа 1 инаркны усеиԥш аусура азакәан мап ацәнакуеит", — иҳәеит иара.
Аминистр актәи ихаҭыԥуаҩ Ҭамаз Ҵахнакьиа иҳәеит Аџьа акодекс ҿыц инақәыршәаны аусура анормақәа аминистрра аҩныҵҟа ишьақәдыргылар азин рымоуп.
Аминистри иара ихаҭыԥуааи аколлегиа алахәылацәа ажәалагала рырҭеит ахәышәтәырҭатә усбарҭа аҷыдарақәа ирхьырԥшны акодекс ҿыц апунктқәа аус рыдулан атәыла анапхгарахь инарышьҭырц.
