АҞӘА, ԥхынгәы 5 — Sputnik, Роберт Џьопуа. Аилатәараҟны ицәыргаз азҵаара: Жәлар Реизара аилатәарақәа онлаин рбара аиҿкаара азҵаара абжьыҭираан иахәҭаны иҟаз ахыԥхьаӡара бжьы амоуит.
Аилатәара иалахәыз 32-ҩык адепутатцәа рҟынтәи 14-ҩык абри азҵаара адгылара арҭеит, 13-ҩык мап ацәыркит, ҩыџьа рыбжьы рымҭиӡеит.
Адепутат Баҭал Аиба абжьыҭира аԥхьа иҳәеит онлаин рбарақәа еиуеиԥшым атәылақәа рҟны ишымҩаԥырго, атехника аганахь алагьы уи аус аиҿкаара уадаҩра шамам.
Левон Галустиан иҳәеит иара журналистк иҳасаб ала ари азҵаара адгылара шеиҭо. Аимак —аиҿак ашьҭахь аспикер Валери Кәарҷиа абжьыҭирахь инеиԥхьеит адепутатцәа.
Адепутатцәа ирыдгалаз Ақәҵараҟны иарбан цәыббра 1 азынӡа онлаин рбаразы атехникатә зыҟаҵарақәа мҩаԥгазарц ҳәа аҳәоит азакәанԥҵаратә орган аофициалтә саит аҟны.
