АҞӘА, нанҳәа 14 – Sputnik, Бадраҟ Аҩӡба. Аԥсны жәлар Рџьынџьтәылатә еибашьра раԥхьатәи амш азы ареспубликаҿы иазгәарҭоит Аԥсадгьыл ахьчаҩ игәалашәара Амш.
Традициала иара алагоит Ахьӡ-аԥша абаҟа аҿаԥхьа ашәҭшьыҵәрақәа рышьҭаҵарала.
"Нанҳәа 14 рзы Кындыӷ сыҟан. Ҳгәы ҳҽанӡамкәа аверталиотқәа хылеит. Урҭ Аҟәаҟа рхы рханы ицон. Иара убри амш аҽны дхәын ақыҭауаҩ Баҭал Ӷәынџьиа иара убасгьы аҽа ҷкәынак, Аргәын зыжәларз", абас игәалаиршәоит уи амш "Агәымшәараз" аорден занашьоу Сергеи Начҟьебиа.
Иара иажәақәа рыла иара изы ақырҭуа ар Аԥсны иалалеит ҳәа агәрагара ицәыуадаҩын. Сергеи Начҟьебиа уи аҽны инаркны иҩызцәеи иареи Мрагыларатәи афронт иналагылеит.
Қырҭтәыла амилаҭтә гвардиа Аԥсны Аҳәынҭқарра аҵакырадгьыл иалалеит 1992 шықәса нанҳәа 14 рзы. Арратә операциа иалахәын ҩ-нызқь рҟынӡа аруаа, акәылӡтәы техника 60 цыра, артиллериа. Аоперациа иаман ахьӡ ҷыда "Меч".
Ақырҭуа ар ирҿагылеит аԥсуаа реиԥш раԥхьатәи амш инаркны урҭ инарывагылаз, хатәгәаԥхарала Нхыҵ Кавказынтәи иааз ҳашьцәа. Аибашьра цон 413 мши-ҵхи.
