АҞӘА, жьҭаара 25 – Sputnik, Амра Амҷыԥҳа. 55-59 шықәса зхыҵуа рыбжьара Борис Багаҭелиа адунеи дачемпионхеит самбо азы. Абри атәы Sputnik акорреспондент илзааицҳаит аспортсмен ихаҭа.
Багаҭелиа иажәақәа рыла иара хәынтәуп аиндаҭларақәа дрылахәуижьҭеи.
Борис Багаҭелиа 100 кьылак рҟынӡа зыкапан наӡоз дрылан дықәгылон. Актәи аиндаҭлараан иара диеикануан Украинатәи аспортсмен, аҩбатәи аан – Бырзентәылатәи аспортсмен.
"Бырзентәылатәи аспортсмени сареи Израиль ҳаицықәгылахьан. Усҟан сара саҵахеит. Уажәы сииааит. Х-минуҭк рыла 10:0 ҳәа аԥыжәара згеит. Бырзентәылатәи аспортсмен иԥсадгьыл аҟны дықәгылон, ахәаԥшцәагьы адгылара ду ирҭон, аха сара исылшоз зегь ҟасҵеит",— иҳәеит иара.
Афинал аҟны Борис Багаҭелиа дицықәгылараны дыҟан Киргизиатәи аспортсмен, аха уи дцәырымҵит. Аӡбаҩцәа аԥсуа спортсмен уи иааираны изырыԥхьаӡеит.
"Сыҽхәоушәа сшәымбан, аха аамҭақәак рышьҭахь иара сара сҿы дааины исеиҳәеит уаанӡатәи сықәгыларақәа шибаз, убри азы аринг ахь дышцәырымҵыз",— иҳәеит Багаҭелиа.
Борис Багаҭелиа самбо инапы алакуп 14 шықәса раахыс. Уажәы иара дазыҟаиҵоит Сергеи Громов. Бырзентәыла имҩаԥысуаз аиндаҭларақәа рҟны Урыстәыла абираҟ даҵагыланы дықәԥон.
Ԥхьаҟатәи ипланқәа макьаназ иазыԥхьагәеиҭом.
Аԥсуа спортсмен Борис Багаҭелиа аветеранцәа рыбжьара самбо азы адунеи дачемпионхеит. Ачемпионат мҩаԥысуан жьҭаара 20-21 рзы Салоники ақалақь, аспорттә комплекс Dak Peraias аҟны. Аиндаҭларақәа ирылахәын 18 тәыла рҟынтәи 270-ҩык аспортсменцәа.
