АҞӘА, ажьырныҳәа 31– Sputnik. Аԥсны Аекономика аминистр ихаҭыԥуаҩ Заур Гәлиеи Аҳәынҭқарратә инвестициатә маҵзура адиректор Инар Гыцбеи Урыстәыла астратегиатә ԥшьгарақәа рмаҵзура ахаҭарнакцәа ирԥылеит. Аԥсны анаплакра аус аҿы аинвистициатә климати административтә ԥгылақәеи ирылацәажәан аиԥылараан, ажьырныҳәа 30 рзы. Абри атәы аанацҳауеит Аекономика аминистрра.
"Аиԥылараан Аԥсны иҟоу аинвестициатә ҭагылазаашьеи иҟоуи иҟалар зылшои административтә ԥынгылақәеи анализ рыҭара иалацәажәан. Иара убасгьы иалацәажәан урыстәылатәи апрактика ахархәара", — иҳәеит Заур Гәлиа.
Иара иажәақәа рыла Урыстәыла астратегиатә ԥшьгарақәа рмаҵзура азыхиоуп ареспублика абри аус аҟны ацхыраара аҭара, атәылаҿ аинвестициатә ҭагылазаашьа аиҭакра.
"Ҳара ҳалацәажәеит ҳаинырра амҩаԥгашьа, ҳусеицура аиҿкаашьа. Уажәшьҭа аконкреттә усурақәа мҩаԥаагалоит", — иҳәеит аминистр ихаҭыԥуаҩ.
Икоммерциатәым аиҿкаара "Апроект ҿыцқәа аус дыруразы астратегиатә ԥшьгарақәа рмаҵзура" шьаҭаркын Урыстәылатәи Афедерациаҿы аекономикатәи асоциалтәи усхк аҟны ауснагӡатәқәа реидкыла амҩаԥгаразы.
