АҞӘА, жәабран 27 – Sputnik, Амра Амҷԥҳа. Жәабран 26 рзы аҳәынҭқарратә ҳәаа иахыргахьеит 30 тонна амимоза. Абри атәы Sputnik акорреспондент илзеиҭалҳәеит Аԥсны Аҳәынҭқарра аҳазалхратә еилакы аҳазалхратә статистикеи анализи рыҟәша аиҳабы Асида Кәыҵниаԥҳа.
"Аҳауатә ҭагылазаашьа иаҳнаҭар аплан нагӡахоит. Сынтәа раԥхьатәи апартиа аҳәаа иахыган жәабран 11 рзы. Ахьҭа ыҟамызт, амимозагьы заа ишәҭит", — лҳәеит Аԥсны Аҳәынҭқарра аҳазалхратә еилакы аҳазалхратә статистикеи анализи рыҟәша аиҳабы Асида Кәыҵниаԥҳа.
Лара иазгәалҭеит 2017 шықәса рзы аплан шынагӡамыз.
"Ҵыԥх ажьырныҳәамза анҵәамҭазы асы леиит. Аҵаа иахҟьаны амимоза зымшәҭит", — лҳәеит Кәыҵниаԥҳа.
Асида Кәыҵниаԥҳа лажәақәа рыла хәажәкыра 8 аламҭалазы ауп еиҳарак ашәҭ аҳәаа ианахырго.
"Аиҳарак иара ахыргоит аныҳәа аламҭалазы, хәажәкыра 2-7 рзы", — лҳәеит лара.
Кәыҵниаԥҳа илҳәоит 4-10 тонна рҟынӡа ииазго аиурист хаҿқәа роуп, ахатәхаҿқәа ракәзар, 50-60 кьыла иҟоу партиалоуп ишиарго лҳәоит Аҳазалхратә еилакы ахаҭарнак.
