АҞӘА, лаҵара 21— Sputnik. Британиатәи апарламент жәларбжьаратәи аилак Акралра Еидгыла анапхгарахь ааԥхьара ҟарҵеит Урыстәыла амчрақәа ирыдҳәало ахаҿқәа рганахь ала асанкциатә сиа дырҭбаарц ҳәа аанацҳауеит РИА Новости.
Урыстәылеи Британиа Дуи рыбжьара аизыҟазаашьақәа уадаҩхеит Солсбертәи аинцидент ашьҭахь.
Хәажәкыра 4 рзы Солсбери, Британиатәи амаҵзура ҷыдақәа аус рыцызуаз, уаанӡа ГРУ аус зуаз Сергеи Скрипали иԥҳа Иулиеи ахәшә рырҭеит.
Абри аан ахархәара аман Урыстәыла иҭыжьу амаҭәашьар А234 "Новичок" ҳәа аҳәамҭа ҟанаҵеит Британиатәи амаҵзура ҷыда.
Урыстәыла акәзар абри мап ацәнакит.
Британиа ду Аԥыза-министр Тереза Меи абри инадҳәаланы Урыстәылатәи адипломатцәа 23-ҩык атәыла иалцахоит, ҩ-ганктәи аизыҟазаашьақәагьы русура ԥкхоит ҳәа аҳәамҭа ҟалҵеит.
Убри аҭакс Урыстәыла Адәныҟатәи аусқәа рминистрра хәажәкыра 17 рзы 23-ҩык Британиа ду Ацҳаражәҳәарҭа аусзуҩцәа "персона нон грата" ҳәа ишьаны мчыбжьык аҩныҵҟала Урыстәыла аанрыжьроуп ҳәа аӡбра аднакылеит.
Уи ашьҭахь "Скрипаль иус" инадҳәаланы, ЕАШ (США) аҳәамҭа ҟанаҵеит атәылаҟынтәи 60-ҩык урыстәылатәи адипломатцәеи 12-ҩык ООН иҟоу атәыла ахаҭарнакра аусзуҩцәеи атәылаҟынтә ишықәцахои Сиетл иҟоу Урыстәылаа консулра хада шадыркуеи рзы.
Иара убри аан иарбанызаалак Урыстәыла ахара ахаразтәыша ршаҳаҭга ыҟан иҟамызт.
Москва акәзар, имҩаԥысуа провокациоуп ҳәа ахнаҳәаауан. Владимир Путин иакәзар иазгәеиҭеит Урыстәыла ахимиатә бџьар амам ҳәа.
Аилак Тереза Меи лкабинет адҵа анаҭеит урыстәылатәи аҳәынҭқарратә уал аганахь ала асанкциақәа алагалахарц.
