АҞӘА, ԥхынгәы 23– Sputnik, Бадраҟ Аҩӡба. Аралли азы Урыстәыла ацентр Афедералтә округ Ахраҿа афинал мҩаԥысит ԥхынгәы 22 рзы ақалақь Ростов Велики аҿы. Иара иалахәын 46-ҩык аспортсменцәа.
"Имҩаԥысуан IX Урыстәыла Ахраҿазтәи автоеиԥхнырыҩлара аетап. Иара убри аамҭазы имҩаԥысуан Аралли азы Афедералтә округ Ахраҿа афинал. Азеиԥшкомандатә зшьала ҳара актәи аҭыԥ аанаҳкылеит. Иара убас хаҭалатәи азшьаҿгьы", — ҳәа еиҭеиҳәоит Ҭимур Соломко.
Иара иажәақәа рыла аиндаҭлара ауадаҩрақәа ацын, автомашьына атормаз аԥхасҭахара иахҟьаны.
"Аиндаҭлара аламҭалаз ақәа леиит. Ҳмашьына атормаз аусура иаҟәыҵит. Уи ашьҭахь атормаз ахәша ацәцо иалагеит", — иҳәоит иара.
Ус ишыҟазгьы аштурман Ҭимур Соломкои апилот Виачеслав Прохорови актәи аҭыԥ ныркылеит.
Ҭимур Соломко аралли далахәуп автомашьына Mitsubishi Lancer Evolution 8 ала.
