АҞӘА, ԥхынҷкәын 19 — Sputnik. Еиду аштатқәа рҟны 2017 шықәсазы абџьар иахҟьаны аҵыхәтәантәи ашәышықәсабжа аҩныҵҟа иҭахаз рхыԥхьаӡара рекордтәхеит ҳәа аанацҳауеит РИА Новости New York Times адыррақәа ҵаҵӷәыс иганы.
ЕАШ ачымазарақәа рхылаԥшреи разыԥхьагәаҭареи рзы Ацентр адыррақәа рыла 2017 шықәса рзы иҭҟьо абџьар ала иҭахеит 39 773-ҩык ауааԥсыра, уи 2016 шықәса иадкыланы уахәаԥшуазар зықьҩык рыла еиҳауп. Иазгәаҭоуп 1968 шықәса раахыс ари арбага зегьы ишреиҳау.
Аҭыжьымҭа аинформациала 2000-тәи ашықәсқәа раан амцабџьар иахҟьаны иҭахаз рхыԥхьаӡара шьақәтәаланы иҟан.
"Иџьашьатәуп иҭышәынтәало аамҭа ашьҭахь иаалырҟьаны иҭахо рхыԥхьаӡара ахьеиҳахо" - иҳәеит ЕАШ ачымазарақәа рхылаԥшреи разыԥхьагәаҭареи рзы Ацентр аԥсрақәа рыстатистика аҟәша аиҳабы Боб Андерсон.
Андерсон иазгәеиҭеит абџьар иахҟьаны иҭахо рхыԥхьаӡара аиҳарак изыдҳәало анаркотикқәа рышьцылароуп ҳәа.
2017 шықәса рыҩныҵҟа анаркотикқәа ирхырҟьаны иҭахеит 70 000-ҩык ауааԥсыра.
