АҞӘА, хәажәкыра 5 – Sputnik, Бадри Есиава. Апроект "Ты супер!" алахәыла ҿыццәа зегьы апроект аԥшьбатәи асезон аконкурс ахь инарыԥхьеит ҳәа иҳәеит авидеоцҳа Москва-Минск-Кишинев-Аҟәа амҩаԥгараан НТВ апродиусор хада Тимур Ваинштеин.
"Ҳара аӡәгьы аган давахар ҳҭахым. Сынтәатәи асезон иалаҳархәит актәии аҩбатәии асезонқәа рҟынтәи ахәыҷқәа, аха алахәыла ҿыццәа зегьы ԥхьаҟатәи атурқәа рахь анеира рылшо, ирылымшо иахьмырԥшкәа, иаразнакы ааԥхьара раҳҭеит апроект "Ты супер!" уашьҭантәи асезон ахь", - иҳәеит Ваинштеин.
Авокалтә проект "Ты супер!" аԥшьбатәи асезон хацыркхоит хәажәкыра 10 рзы. Апроект "Ты супер!" актәии аҩбатәии асезонқәа ирылахәын 300-ҩык рҟынӡа аҿар. Аԥшьбатәи асезон аҿы 10 тәылак рҟынтәи 57-ҩык ахәыҷқәа асценахь инеиуеит.
