АҞӘА, лаҵара 22 – Sputnik, Бадраҟ Аҩӡба. Аҟәа ауаажәларратә транспорт аусура иалагеит ҳәа Sputnik иазеиҭалҳәеит аҳҭнықалақь ахадара ауаажәларра рнырразы аҟәша аиҳабы Амина Ҳәатышь.
Атроллеибустә усбарҭа аиҳабы Иури Барганџьиа иааицҳаит атранспорт ахырхарҭақәа зегьы аус руеит, ареис ахь 10 троллеибуск ҭыҵит ҳәа.
Аҟәа ауаажәларратә транспорт аныҟәара ԥкын лаҵара 21 рзы, аоппозициа акциа инадҳәаланы. Аусура иҭымҵит амаршруттә таксиқәа, автобусқәа, атроллеибусқәа.
Лаҵара 20 рзы атәыла аоппозициа алхрақәа рыҿҳәара анахара дҵаны иқәыргыланы еизеит. Апарламент уи мап ацәнакит. Абри ашьҭахь азеиԥшмилаҭтә акциа рылаҳәан.
Лаҵара 21 рзы еиҿагылаз аганқәа ирылдыршеит акы аицазнеира. Алхрақәа рыҿҳәара ԥхынгәы 21 аҟынтәи нанҳәа 25 ахь иахыргеит.
