АҞӘА, рашәара 6 – Sputnik, Бадраҟ Аҩӡба. Акомандақәа "ConIFA" - "Медиа" аиҩызаратә еицыхәмарра мҩаԥыргеит ҳәа Sputnik иазааицҳаит ашьапылампыл азы Аԥсны Афедерациа апресс-маӡаныҟәгаҩ Алхас Манаргиа.
""ConIFA" акоманда иалахәын атурнир аиҿкааҩцәа. Ахәмарра дәахьы днеит аиҿкаара апрезидент Пер Андерс Блиндгьы. "Медиа" акоманда еиднакылеит АИХ ахаҭарнакцәа", - иҳәоит иара.
"Зегь агәалаҟазаара бзиа рыманы ихәмаруан. Аимабзиара шыҟаз умбарц ауамызт", - еиҭеиҳәоит Манаргиа.
Ҳәарада, ари атурнир алахәылацәа рыҩаӡара ConIFA-2019 алахәылацәа рыҩаӡара иеиԥшымызт, аха ус шакәызгьы, ахәмарра аинтерес аҵан, ҳәа азгәеиҭоит иара.
"Аиҳараҩык рықәра шыҟазгьы уаанӡатәи рԥышәа рныԥшуан. Арҭ ауаа еидызкылоз ашьапылампыл ахь абзиабароуп. Ахәмарра аамҭа хада хыркәшахеит 4:4 ҳәа, аха нас апенальти уи аҭагылазаашьа аԥсахит", - иҳәоит Манаргиа.
Акоманда "Медиа" аԥыжәара аиуит.
ConIFA рашәара 7 2013 шықәса рзы ишьаҭаркуп, уи еиднакылоит FIFA иалахәым 40 команда.
