АҞӘА, цәыббра 23 – Sputnik, Бадри Есиава. Аԥсны жәлар рпоет Дырмит Гәлиа иҩны-музеи 45 шықәса ахыҵит.
Аҩны-музеи адиректор Светлана Корсаиаԥҳа лажәақәа рыла, Гәлиа ари аҩны инапала иргылеит. Апоет иԥсҭазаара даналҵ ашьҭахь иԥшәмаԥҳәыс Елена Бжалаа аҳәынҭқарра ҳамҭас иалҭеит.
Адиректор лажәақәа рыла, аҩны-музеи лассы-лассы ашколхәыҷқәа аҭаауеит, имҩаԥысуеит алитературатә хәылԥазқәа. Иахьазы ахыбра шьаҭанкылатәи аремонт азутәуп.
"Аҩны аҭагылазаашьа акыр иуашәшәыроуп. Хымԥада аремонттә усурақәа мҩаԥгатәуп. Аибашьра ашьҭахь хәҭа-хәҭала аремонтқәа мҩаԥган, аха шьаҭанкыла аремонт азутәуп", - лҳәеит лара.
Дырмит Иосиф-иԥа Гәлиа – Аԥсны жәлар рпоет, аԥсуа литература ашьаҭаркҩы, арккаҩы, апоет, апрозаик, аҭоурыхҭҵааҩ, аетнограф, афольклорист, алингвист.
Дырмит Гәлиа Аҟәа анышә дамадоуп. 1912-1960 шықәсқәа рзы дахьынхоз аҩнаҿы амузеи аартуп.
2019 шықәса рзы ара имҩаԥырго ауснагӡатәқәа зегьы Дырмит Гәлиа диижьҭеи 145 шықәса аҵра иазкуп.
Иара убас шәаԥхьар ҟалоит:
-
"Интермузеи": Дырмит Гәлиа имузеи апавилион аартуп Москва
-
Афестиваль ашьҭахь Дырмит Гәлиа иҩны-музеи аекспонат ҿыцқәа рыла ихаҭәаауеит
