АҞӘА, абҵара 25 – Sputnik, Сариа Кәарцхьиаԥҳа. "Россотрудничествеи" Аԥснытәи аҳәынҭқарратә университети аԥснытәи абитуриентцәа ирзеиҭарҳәараны иҟоуп урыстәылатәи аҵараиурҭақәеи ААУ-и рҭалараан алхрақәа шымҩаԥысуа атәы. Абри атәы Sputnik иазеиҭеиҳәеит Аԥсны иҟоу "Россотрудничество" аконсультант Дмитри Кононов.
"Ҳара есышықәса имҩаԥаагоит "Урыстәылатәи аҵараиурҭақәа роушьҭымҭацәа иаку рымш". Ари ауснагӡатә абитуриентцәа рхы ахьдырхаша еиҳа имҩақәнаҵоит. Ҳара иааҳаԥхьеит урыстәылатәии аԥснытәии ауниверситетқәа рхаҭарнакцәа. Абитуриентцәа ирзеиҭаҳҳәараны ҳаҟоуп ирымоу алшарақәаеи урҭ рхархәашьақәеи ртәы", - иҳәоит Кононов.
Ԥшьымш рыҩнуҵҟа "Россотрудничествеи" Аԥснытәи аҳәынҭқарратә университети рхаҭарнакцәа ареспублика араионқәа зегь рҟынтәи абитуриентцәа ирыҿцәажәоит.
Абҵара 25 асааҭ 16:00 рзы аиԥылара мҩаԥысуеит Москва Аҩны аҿы.
Абҵара 26 асааҭ 11:00 рзы – Гагра араион ахадара азал ду аҿы, асааҭ 16:00 рзы – Гәдоуҭа араион ахадара азал ду аҿы.
Абҵара 27 асааҭ 10:00 рзы – Гәылрыԥшь араион ахадара азал ду аҿы. Асааҭ 14.00 рзы – Гал араион ахадара азал ду аҿы.
Абҵара 28 асааҭ 10:00 рзы – Тҟәарчал араион ахадара азал ду аҿы. Асааҭ 14:00 рзы – Очамчыра араион ахадара азал ду аҿы.
Абҵара 29 асааҭ 16:00 рзы Аԥснытәи аҳәынҭқарратә университет аҿы "Россотрудничество" ахаҭарнакцәа еиҭарҳәараны иҟоуп Урыстәыла аҵараиурҭақәа рҟны амагистратуреи аспирантуреи рҭалара шалыршахо атәы.
Иара убас шәаԥхьар ҟалоит:
-
Sputnik аҟны Аԥсныи Урыстәылеи рҿар рыпроект иалацәажәеит
