Ажьырныҳәа 31 рзы Аԥсны Аҳәынҭқарратә аинформациатә маҵзура "Аԥсныпресс" иахыҵит 25 шықәса.
"Ачынуаҩ ирџьара азин сымоуп ҳәа сгәы иаанагоит, аха хымԥада раԥхьа иргыланы зегьы иамазароуп аҵаҵӷәы. Ус иара угәы дақәымшәеит ҳәа уи аҟаҵара иашам. Ачынуаҩ иусураҿы акгьы изыҟамҵазар, илымшазар, уи ҳәатәуп, аха уи зыхҟьаз уҳәароуп. Ҳусураҿы иҟоуп ахақәиҭра, аматериал аҩраан абри абас иҟабҵароуп ҳәа адҵа аӡәгьы исыимҭацт", - ҳәа азгәалҭеит Ҵәыџьԥҳа.
Избан зны-зынла аинформациа аԥхьаҩ иҟынӡа иагхан изнеиуа, иарбан мзызқәоу уи зыхҟьо атәы аиҿцәажәараҿы еиҭалҳәеит Ҵәыџьԥҳа.
"Ҳара ҳҳәынҭқарратә маҵзуроуп, ҳара иҳамам ус еиԥш алшара аинформациа гәамҭаӡакәа џьара иҳаҳаит ҳәа акьыԥхь арбара. Аинформациа ахьынӡаиашоу еилкаатәуп, ауаҩы иажәақәа ааҳгартә еиԥш ҳиҿцәажәароуп, анаҩс адырра анышьақәҳарӷәӷәалак ашьҭахь ажәабжь ҭҳажьуеит, уи зегьы, ҳәарада, аамҭа агоит", - ҳәа еиҭалҳәеит Ҵәыџьԥҳа.
Инеиҵыху аиҿцәажәара шәазыӡырҩы арадио Sputnik Аԥсны аефир аҿы.
