АҞӘА, мшаԥы 23 апр – Sputnik. Аахыҵ Уаԥстәыла ахада ихьӡала Аслан Бжьаниа дидныҳәалеит Аԥсны иҟоу Аахыҵ Уаԥстәыла Ацҳаражәҳәаҩ Олег Боциев.
"Ҳаҭыр зқәу Аслан Гьаргь-иԥа, Аахыҵ Уаԥстәыла анапхгареи ажәлари рыхьӡалеи, хаҭала сара сыхьӡалеи ишәыдысныҳәалоит официалла Аԥсны Аҳәынҭқарра ахадас шәыҟалара", - аҳәоит адныҳәаларатә шәҟәаҿы.
Анатоли Бибилов иажәақәа рыла, аҵыхәтәантәи алхрақәа лабҿаба иаадырԥшит аԥсуа жәлар рҿаԥхьа Аслан Бжьаниа илшамҭақәа ахәшьара шроуз.
"Ҳара ҳазыхиоуп аԥсуа-ауаԥс еизыҟазаашьақәа ԥхьаҟагьы рырҿиара", - азгәеиҭеит Бибилов.
Олег Боциев иҳәеит Аԥсны адунеитә еиҿкаара иахьахәҭаку азы аполитикатә, аепидемиологиатә, аекономикатә ԥышәара иахымсыр шамуа.
"Имариам аҭагылазаашьаҿы, Аслан Гьаргь-иԥа, ишәзеиӷьасшьоит агәабзиара, ачҳара, аполитикатә лшара, Аԥсны ажәлар – аҭынчреи аҿиареи", - иҳәеит Олег Боциев.
Аԥсны ахада иҭоубашьҭаҵара азакәан инақәыршәаны имҩаԥысит АКХ аҵыхәтәантәи алкаақәа анрыланаҳәа амш инаркны 30 мшы рышьҭахь.
Аԥсны ахада иалхрақәа мҩаԥысит хәажәкыра 22 рзы. Алхрақәа рҟны аиааира игеит Аслан Бжьаниа, иара изы иарҭеит 56,5% абжьқәа. Адгәыр Арӡынба иоуит 35,42% бжьы, Леонид Ӡаԥшьба – 2,22%, зегьы ирҿагыланы – 1,75%.
Иара убас шәаԥхьар ҟалоит:
- Ажәлар аиҳабыра рыгәра рго аҟаҵара: Аслан Бжьаниа аҭоубашьҭаҵараан дықәгылеит
