АҞӘА, ԥхынҷкәын 12 - Sputnik. Аԥсны Аҳәынҭқарратә ҳазалхратә еилакы аусзуҩцәа рымчала 2505 ак рҟынӡа амаининг хархәагақәа аанкылоуп Аԥсныҟа амаинингтә хархәагақәа ралагалара азин аҟамҵара ашьҭахь ҳәа иҳәеит аусбарҭа аиҳабы Гурам Инаԥшьба аԥыза-министр Александр Анқәаб имҩаԥигоз аилатәараҿы.
Аминистрцәа реилазаара аамҭала Аԥсныҟа амаинингтә хархәагақәа ралагалара азин аанкылахарц ақәҵара аднакылахьан жьҭаара 21 рзы, уи инақәыршәаны 2020 шықәса ԥхынҷкәын 20 инаркны 2021 шықәса рашәара 1 аҟынӡа ари ақәҵара аус аулоит.
"Азин аҟамҵараз ақәҵара анрыдыркыла инаркны Аԥсны аҵакырахь залагалара рҽазыршәоз амаинингтә хархәагақәа рхыԥхьаӡара 2 505 ак инаӡоит. Дара аԥсуа-аурыс ҳәаа иахысуа атранспорт хархәагақәа рҿы иаарԥшуп", - иҳәеит Инаԥшьба.
Инаԥшьба иҳәеит аилак аусуҩцәа уахыки-ҽнаки рыҩнуҵҟа 2000 рҟынӡа автомашьынақәа шгәарҭо. Убри аан 30% машьына дуқәоуп, 70 % - машьына ласқәоуп.
Аҳәааҿы уахыки-ҽнаки рыҩнуҵҟа 31-ҩык аилак аусзуҩцәа ҷаԥшьоит. Амаининг хархәагақәа ралагалара алмыршаразы ауснагӡатәқәа рыдкылара инадҳәаланы аҷаԥшьаҩцәа ргәыԥ иалахәуп аилак ахантәаҩы ихаҭыԥуаа руаӡәки аилак аппарат хада аусзуҩцәеи.
Инаԥшьба иазгәеиҭеит агәаҭараз атехникатә хархәагақәа рыҟамзаара инадҳәаланы амашьынақәа аидара рықәхра анрықәшәо ыҟоуп, ауадаҩрақәагьы ацуп аҳазалхыҩцәеи аныҟәцаҩцәеи рзы.
Александр Анқәаб анапынҵа ҟаиҵеит Аԥсныҟа иалало атранспорт ахылаԥшра иахьынӡалшо ирӷәӷәаны иазыҟаҵалазарц.
"Аҳәааҿы игылоу зегьы рмаҵзуратә напынҵақәа ишақәнагоу инарыгӡалароуп. Шәареи, Аԥсны ААРи, Аԥсны АШәМи ус хаданы ишәымоу амаҵзурауаа ирымоу рзинмчқәа иахьақәнагам рхархәара аԥырҟәҟәаароуп", - иҳәеит иара.
Ԥхынҷкәын 8 рзы Аминистрцәа реилазаара аамҭала Аԥсныҟа амаинингтә хархәагақәа ралагалара азин ааннакылоит 2021 шықәса рашәара 1 аҟынӡа. Аминистрцәа реилазаара иара абри ақәҵарала акриптовалиута аиуразы аусурақәа зегьы ааннакылоит.
Иара убас шәаԥхьар ҟалоит:
