АҞӘА, ԥхынгәы 2 - Sputnik. Кәыдрытәи аиҩхаа, Гьынҵәыш ақыҭаҿы ацҳа ҭабгеит ҳәа аанацҳауеит Аԥсны АҶА.
Аҟазауаа ражәақәа рыла, аӡхыҵраан адгьыл ҿнаӡәӡәааит. Уи иахҟьеит ацҳа аҭабгарагьы. Уи инамаданы аамҭак азы қыҭақәаки Кәыдрытәи аҩхааҿы иҟоу Урыстәыла АШәМ Аҳәаахьчаратә усбарҭа архәҭақәа ҩбеи рымҩа аркхеит.
Арахь иааиз Аԥсны АҶА аминистр Лев Кәыҵниеи урыстәылатәи аҟазауааи ахҭыс ахьыҟалаз аҭыԥ ҭырҵааит, ахышәа-ҵышәа азгәарҭеит.
Аамҭала ажәытә цҳала аиҭанеиааира азыӡбоуп. Ацҳа ашьаҟақәа шәарҭам, ақә ҟаҵатәны иҟоуп.
Иҟоу аҭагылазаашьазы атәыла аиҳабыра адырра рыҭоуп, уахь инашьҭуп аусӡбразы аҟазауаа.
Лев Кәыҵниа иазгәеиҭеит хырԥашьа змам ҭагылазаашьак ҟалар аусбарҭа ацхыраара аҟаҵара ишазыхиоу.
