Амхы, акалаҭ, ауардын, ашыла: аԥш инаркны абысҭанӡа

Аџьықәреи акультура Аԥсны иқәнагалеит XVIII ашәышықәса анҵәамҭазы.

Аџьықәреи алаҵара иалагоит лаҵарамзазы, анаҩсан идрашәоит, аҿыхра иалагоит ҭагалан, ибзианы ианҩалак.

Уажәы ҳазҭагылоу абҵарамза аҽаҩра аингалара иашыкьымҭоуп.

Аҽаҩра аҭагалара, аингалараҿы ацхыраара узҭо маҭәарқәоуп: амагана, акалаҭ, ауардын, аҷҟарапат уҳәа.

Аџьықәреи анҭаргалалак ашьҭахь арахә рзы аԥҳә аӡын хәы ҳәа ирҵәахуеит.

Уи ҷҟарапатла аҵлақәа рҿы еиқәҵаны иҟарҵоит.

"Амхурсҭа аҳкәажә" ҳәа ззырҳәо аџьықәреи аарыхны ацаҟынӡа анагаразы шаҟа џьабаа аҭахузеи? Адгьыл ацәаӷәара, алаҵара, арашәара, аҭагалара уҳәа.

Аԥсны иҟоуп еиуеиԥшым аԥш жәлақәа: аԥш шкәакәа, аԥш ҩежь, аԥш ҟаԥшь, аҩсҭаа иԥш уб.иҵ.

Аџьықәреи цәырҳәны аца иҭарыԥсоит.

Аԥш аҵәы иахаҵаны иӡны, ма ижәны ирфоит.

Ҭагалан уажәааны анхацәа рымхқәа анҭаргалалак, ршәыр-рқәыр, руҭраҭых ҿыхны ианалгалак, аҽаҩраныҳәа мҩаԥыргоит.

Аџьықәреи аӡлагараҟны ирлагоит, анаҩс ашыла алыхәҭала ирхәуеит.

Ашылала ируа абысҭа аԥсуа ичыс хада - агәыхә ауп.

Аԥсны ируеит ҩ-хкык абысҭа. Очамчыратәи абысҭеи гәдоуҭатәи абысҭеи.

Аџьықәреи иалху ашыла ашьақар, акрахмал, авитамин В1 алоуп. Иара ирласны иухаҳауа акакәны ишьоуп.

Абысҭа ԥханаҵы ашәеилаҵеи ашәхарҩеи аларҵоит.

Иара убас абысҭа уаҳа наҭахымкәа ианаалоит аџьыкҵәаҵәеи ашьыхәи рылаҵаны ирҟәыҷу ашәаӡа агәылаҵаны.