https://sputnik-abkhazia.info/20250330/emraz-chamagua-abar-akhys-ashata-shaas-irymou---aprints-iio-shaarts-sakhup-1054192338.html

Ҭемраз Чамагәуа: "Абарҭ ахҭыс џьашьатәқәа шаҳаҭс ирымоу - апринц ииҳәо шәаҳарц сҭахуп"

Ҭемраз Чамагәуа: "Абарҭ ахҭыс џьашьатәқәа шаҳаҭс ирымоу - апринц ииҳәо шәаҳарц сҭахуп"

Sputnik Аҧсны

Аԥсни Адыгатәылеи зыҽраԥсазтәыз артист, "Ахьӡ-Аԥша" аорден III аҩаӡареи "Агәымшәараз" амедали занашьоу, Аԥсуа ҳәынҭқарратә драматә театр актиор Ҭемраз Чамагәуа... 30.03.2025, Sputnik Аҧсны

2025-03-30T11:25+0300

2025-03-30T11:25+0300

2025-03-31T08:22+0300

аԥсны

аналитикеи аиҿцәажәарақәеи

аԥсны

акультура

https://cdnn1.img.sputnik-abkhazia.info/img/07e9/03/16/1054199258_0:38:720:443_1920x0_80_0_0_7aa4ad0b50920edcb6fe7b4417647bc3.jpg

Ҭемраз Чамагәуа схәыҷаахыс дыздыруан, избанзар саҳәшьеиҳаби иареи атеатртә институт аҿы аҵара еицырҵон. Аха, актиор иаҳасабала саниеилаҳаз, аҵара даналга ашьҭахь Н. Ҭарԥҳа ллакә "Амра аԥҳа" (ареж. Е. Коӷониаԥҳа) аҿы аԥсуа принц Ахра ироль анынеигӡоз ауп. Иҵӡозеи уи аахыс, аха амра ашәахәақәа аазгаз апринц иахьагьы сыбла дыхгылоуп, анаҩсан иихәмарыз зегьы сышрыхәаԥшогьы. Ахра ихаҿсахьа сыхнахны сшамаз иахьанӡа саанхеит, избанзар ицәырҵра иацын аромантикатә лашара. Усҟантәи аҭыԥҳацәа рабиԥара иара ибара иазгәышьуан, Аҟәа аԥшаҳәаҿы еимдон апринц ицәаара рбарац азы... Уи аахыижьҭеи 45 шықәса рҟынӡа мҩасхьеит, аха агәыкра зцыз Ахра ихаҿсахьа сара сеиԥш изхамышҭуа рацәаҩуп.АлагамҭаҬемраз Чамагәуа алагамҭа ҳәа ҳазҿу абас ауп ишигәалашәо: "Ҳара зегь ҭаацәала ашәа ҳҳәон. Ԥшьҩык аиҳәшьцәеи хҩык аишьцәеи ҳаҟан. Аиашьа ҳәа иахьа иҟоу сараӡәк соуп. Абри ашәаҳәара зегь ҳаб иҟынтәи иаауеит. Усҟан аибабарақәа ҳаман. Ҳара Ҳабҩы ҳадҳәалан Аҷандара аҩадахьы. Уа Чамагәуаа рацәаҩны инхон. Ҳабду Шьрыф иӡыхьгьы нханы ыҟоуп уа. Сабгьы саб иашьагьы уброуп аҵара ахьроузгьы, ашьҭахь саб иашьеиҳаб Абӷархықәҟа дааргеит еиҳабыс, нас ҳасабеилыргаҩыс уҳәа еиуиеԥшым аусқәа инапы рылакын. Саб Расим дафицарын, Ԥоҭ аус иуан ашәарҭадара аганахьала, сан дахьибазгьы уброуп. Аха нас иҭаацәа арахь дхынҳәратәы иныҟәеит. Саб иашьа Абӷархықә аусура даналага иашьагьы, иаҳәшьцәагьы зегь арахь илбааигеит. Саб ашкол аҿы аусура далагеит анхамҩатә ус азы. Амашьына аус бзианы идыруан, ашкол аҿгьы уи амаҭәар дирҵон. Расим ашәаҳәара илан, усҟан агәыбылра ыҟамзи, ҳаиашьара, санду лашьцәа Лазаа уҳәа ҳа ҳҿы еизон. Ианеидтәалалакгьы аныҳәаҿеи, аныҳәаҿеи рыбжьара ашәа аныбжьарҵоз ыҟан".Ашколи аԥсҭазаареиҬемраз Чамагәуа Абӷархықә ԥшь-класск далгеит, ашьҭахь илеишәа ҷыда аиқәыртәаразы, дабжьоит ҳәа Каладахәаратәи аинтернат ахь диаргоит. Абар иара уи ихаҭа ахҳәаа шеиҭо:"Схацәгьоуп исҳәо, аха сара маҷк сеилҟьацәан, зны-зынла аурокқәа аабжьасыжьуа егьиуа салагеит, сласцәан, уи азоуп аинтернат ахь сзыршьҭыз. Аиаша ҳҳәозар, уа даара арҵаҩцәа бзиақәа ҳаман, ашкол ӷәӷәан. Ақсент Занҭариа ҳәа дыҟан, Аҟәа аредкациаҿгьы аус иуан, убри акласс напхгаҩыс дҳаман, аԥсуа бызшәа абзиабара уамакала иҳалаиааӡеит. Андреи Чычба директорс дыҟан усҟан. Уа аа-класск ракәын иҟаз, саналга схынҳәны сааит Абӷархықәҟа. Иаразнак игәасҭеит Калдахәара исоуз аҵареи араҟатәии аивгарақәа шрымаз. Арҭ сырхыҳәҳәозшәагьы збо салагеит. Арҵаҩцәа аурок уара имҩаԥугар ҳәа ансарҳәозгьы ыҟан. Аха, арахь саниас Гәдоуҭа ашкол иҭырцоз злеишәа цәгьаз зегь Абӷархықә иаарго иалагеит. Урҭи сареи ҳбызшәа еилибакаауан, "аблатноира" ззырҳәо ҳҽаҭашәа ҳааҟалеит…".Атеатртә ҟазараИалкааны сактиорхоит ҳәа иӡбны имамызт Ҭемраз данхәыҷыз. Амала, усҟан Абӷархықә аклуб аиҳабыс иҟаз Лиосик Аҟалӷьба инапхгарала Шоҭа Ҷкадуа иҩымҭақәа ирылхны аспектакль хәыҷқәа ықәдыргылон. Ҭемразгьы урҭ дрылахәын. "Усҟан ақыҭақәа еибгамзи, акәашара, ашәаҳәара азы аусқәа еиҿкааны иҟан. Атеатртә институт сҭалара шыҟалаз абас ауп. Аҟәа акәашара далан Аҟалӷьба ҷкәынак, убри днеины исеиҳәеит атеатртә институт ахь ирышьҭуеит ҳәа. Ҳаицны ҳааит атеатр аҿы. Атеатр ахыи аҵыхәеи сдыруагьы сыҟамызт аиашазы. Инеиз аҿар зегьы аӡәаӡәа ҳрыдырҵеит, сара Амиран Ҭаниа инапы санырҵеит сазыҟеиҵаларц. Аетиуд анагӡара, апроза, нас ажәеинраала аԥхьара уҳәа сҽазысшәон. Ҵаҟа акасса аҟынтә уахьыҩналоз сгыланы "Акырцхеиԥш ахымҩас анлеиуаз" ҳәа асолдаҭ изкыз А. Лашәриа иажәеинраала саԥхьон. Хыхь афоие ахь санԥшы Ира Коӷониаԥҳа дықәгылан иаркы, ирцә ҳәа. Ари дызҭало ссирхап сҳәан, сажәеинраала насыгӡеит. "Абас уаԥхьар уҭалоит" иҳәан Амиран дцеит. Ажәакала атеатртә институт сҭалеит 1972 шықәсазы", - игәалаиршәоит Ҭемраз.Астудентра"Арҵаҩцәа бзиақәа ҳаман аинститут сахьҭалаз. Аха, атеатр иақәнагаз адыррақәа ҳацәмаҷын. Ҳкурс Кукури Патариӡе напхгаҩыс даман, Малико Мревлишвили асценатә бызшәа ҳалҭон. Џьара ҳаҵамхандаз ҳәа зегьы ҳхы аус адулара ҳалагеит. Ҳкурс бзиан аиашазы – Кьесоу Ҳагба, Роман Сабуа, Сырбеи Сангәлиа, Ира Коӷониаԥҳа уҳәа џьарак ҳаҟан. Атеатр закәыҵәҟьоу анеилаҳкаа, актәи акурс анаҳаркы Нели Ешԥҳа Москваҟа аԥсуа театр анылгоз ҳаргьы ҳанырга ашьҭахь ауп. Убасҟантәи ҳныҟәара иаҳнаҭаз даара ирацәахет. Акурстә спектакль – (А. Вампилов "Аиашьа еиҳабы") аҿы Сильва ироль насыгӡон, аԥеиҳаб ицыз ҷқәынан, агитара аирҳәо егьиуа дыҟан. Уи драматургиаҵәҟьан аиашазы. Ара иааҳган ақыҭақәа зегьы ҳрылсит, аԥсуа хәаԥшҩы ибзианы идикылеит. Адипломтә спектакль акәзар А. Чхеиӡе "Ацҳа" ҳахәмаруан. Адукат ироль насыгӡон уаҟа. Абри исҳәо зегьы сзанааҭ азааигәахара акәын…", - игәалаиршәоит астуденттә ԥсҭазаара Ҭемраз.Шәымшәан сыжәлар амра шәзаазгоит…"Сара исразҟны иҟалаз аартны ибасҳәоит. Атеатр аҿы ҳанааи атеориа аганахьала ҳазыҟаҵан, ацензура иахымсуаз алитературагьы ҳаԥхьахьан, аха уи азхомызт. Насыԥс исоуз убри ауп, аԥхьа сааиреи абри Н. Ҭарԥҳа ллакә "Амра аԥҳа" Еҭери Коӷониаԥҳа лықәыргыламҭеи сақәшәеит. Амра аԥҳа - Роза Дбарԥҳа дыхәмаруан, сара Ахра ироль азы салылхит ақәыргылаҩ. Даҽакала иаҳҳәозар, аԥсуа принц ироль соуит. Азиз Агрбеи Леиуарса Касланӡиеи рҽеиҭнырыԥсахлон Амра ахаҿсахьа ахәмарраҿы. Минадора Зыхәԥҳа Саҭанеи Гәашьа лхаҿсахьа налыгӡон. Анна Аргәын - Коношок ааԥын аҳкәажә лроль дыхәмаруан, Варвара Џьыкырԥҳа аџьныш лроль... Иара лакәны ауп ишықәҳаргылоз, аха аиҳабацәагьы, аиҵбацәагьы ирызкын, аҵакгьы дуун. Абри 1977-тәи аамҭақәа ианрасакьаҳәымҭаз акәын. "Шәымшәан сыжәлар амра шәзаазгоит" ҳәа сандәықлоз иаанагоз агәыӷрахь ахьарԥшра акәын. Е. Коӷониаԥха зегь лыӡбит, Дмитри Кәартаа режиссиор хадас даныҟаз акәын, лара лхатә ҭахрақәа аартны илҳәеит. Сара исҭаху актиорцәа зегь згоит лҳәан абиԥарақәа зегь алалҵеит. Аспектакль араҟагьы, иара агастроль ҳахьцозгьы зегьы ирыдыркылон", - сызҵаара аҭак ҟаҵо иҿынеихеит Ҭемраз.Аспектакль "Амра аԥҳа" хҭысны иҟалеит Ҭемраз ишиҳәо ала. Актриса Еҭери Коӷониаԥҳа лзы уи раԥхьатәи режиссиортә ԥышәаран. Актиор иазгәеиҭоит ақәыргылаҩ ихы дақәгәыӷуа дшыҟалҵцаз: "Сара исзымдыруаз мҩак аатуан. Ахақәиҭрагьы сылҭеит аиашазы. Аспектакль алагон Аԥсны аԥсуаа ишҳауз асцена ала. Даара ибзианы илыӡбеит. Лара лыспектакль аҿы ицәырҵит аҵеи бзиа ида ԥсыхәа шҳамам атема. Амала, уи плакатҵас идеологианы иҟалымҵаӡеит, исахьаркыраны ицәырылгеит. Атеатр аҿы сара 45 шықәса инареиҳаны аус сухьеит. Зегь реиҳа ихадоу ҳәа еилыскааз акызаҵәык ауп - актиорк иаҳасабала иҟауҵо еилымкаакәа ахаан умхәмарлан. Ахәаԥшцәа рахь иуҳәарц иуҭаху — ирыдыркылоу ирыдрымкылоу иаразнак иубоит!".Актиортә лахьынҵаАктиор аҟазара иланы, иҭеиҭԥшгьы бзианы, аха атеатр аҿы алахьынҵа бзиа анимоуа ыҟоуп. Мзызс иамозеи уи? Изчаԥода актиор илахьынҵа? Абас иҟаз азҵаара изыскит аиубилеи змоу:"Аурыс театр аҿы актиор абри сыхәмарыр сҭахуп ҳәа ажәалагала ҟаиҵар алшоит арежиссиорцәа рганахь. Уи ҳара ҳдунеихәаԥшраҿгьы, ҳҟазшьаҿгьы иҟаӡам. Ибзиаӡам уи ҳара иахьҳамам, аха иҳамаӡам. Анахь иҳархаргьы, арахь иҳархаргьы 20-тәи ашәышықәса инаркны атеатр зтәу арежиссиор иоуп. Уаанӡа актиортә театрын. Атеатр лахҿыхроу мацара џьызшьо ыҟоуп, аха атеатр аҿы ауаҩы днеины аспектакль дахәаԥшны дантәылҵуа, иҽыԥсахны ддәылымҵыр, уи спектакльӡам. Ахәаԥшҩы дшанхароуп, уи ада ԥсыхәа амаӡам. Бара бызҿу алахьынҵа азҵаара, уи арежиссиор иоуп знапы иану. Арежиссиор иарбан ҩымҭазаалак иигалакгьы ибоит ииҭахыу дарбану, убра уақәшәар уақәшәеит, уақәымшәар уақәымшәаӡеит. Уи атеатрқәа зегь рҿы иҟоуп. Уажә ҳара ҳабиԥара 70-тәи ашықәсқәа ирыҵаркуа, иҵегь заатәиқәагьы алаҵаны иаҳҳәозар, усҟантәи уажәтәи атеатр зынӡа иузеидкылаӡом. Аӡын аԥсшьарақәа анҳамаз Москваҟа ҳрышьҭуан, иаҳҳәап Г. Товстоногов "Аҽы аҭоурых" ( Л. Толстои иповест ала) сахәаԥшхьан, уи Голливуд ахьӡуҵар ауеит. Иара аус зциуаз актиорцәа дуқәа – И. Смоктуновски, С. Иурски, К. Лавров уҳәа зегь хадаран, аха Товстоногов дызлаиааиуаз са соуп ҳәа аӡәгьы далкааӡамызт, еҵәаџьаа ракәны иҟан дара. Иара еидикылон. Товстоногов ирепертуар зегь сахәаԥшит сара, ара Шәачагьы агастроль рыман азы сзыхьӡаз рацәоуп. Уа актиорцәа аӡә иаҵкыс даҽаӡә деиӷьын. Сара хаҭала атеатр аганахьала разҟыс исоуз аԥхьатәи сроль – Ахра ( "Амра аԥҳа") ауп. Акы уацәымшәан баба ҳәа Домогаров дуӡӡа иҵаҩы Леуарса Касланӡиа унапы уанкны уанынаигааиго разҟыми?", - саҭеикит Ҭемраз.Апринц Сехьисмундо"Амра аԥҳа" аҿы ироль наигӡаларц азы Ҭемраз ишиҳәо ала, ақәыргылаҩ Е. Коӷониаԥҳа арра ицара акыраамҭа дахлырԥон. Нас, 25 шықәса дырҭысуаны, иџьбараз асовет система арра дамшьҭыр амуит. Актиор Германиа аррамаҵура дахысит. Арра даналга атеатр ахь даныгьежь Валери Ақаҩба Москвантәи иаара дақәшәеит. "Аха, акыраамҭа сахьымхәмаруаз маҷк асцена ақәлара сацәнаршәеит. Убасҟан Ақаҩба иқәиргылон Е. Сымсым ипиеса "Амра хара ашәахәақәа". Убраҟа – ахьчаҩ шкәакәа аофицер (офицер белой гвардии) ироль сыхәмарит. Ароиаль, ажәеинраалақәа уҳәа, апоезиатә хыԥша ацын уи аспектакль. Асахьаҭыхҩы Е. Котлиаров исценографиа акәын, игьежьуаз асцена ароиаль шкәакәа ықәгылан. Зны инышьхон асцена, нас иаауан ароиаль шкәакәа. Аемхаа даныршьыз атемоуп убра иҟаз, уи ироль Рушьни Џьапуа инаигӡон. Анаҩсан, исқәашьхеит П. Кальдерон "Аԥсҭазаара ԥхыӡуп" аҿы апринц Сехизмундо (ареж. В. Ақаҩба) ироль анагӡара. Аиаша басҳәоит саҟәыҵны сцоит аҟынӡа снеит".Избан еснагь апринцәа рроль зурҭоз, сиазҵаауеит еиҭах Ҭемраз. Амплуа ззырҳәо аԥсахра дазхәыцуазу еилыскаарц."Дагьпринцуп, дагьбаандаҩуп Сехьисмундо. Исцәыуадаҩхеит аԥхьа, избанзар ахырхарҭа ҽакын. Сшьацәхыртәуа, сҽырԥшӡаны сызҿқәаз ара иауамызт, сҽысыԥсахыр акәын. Ара аԥхыӡи алабҿабеи рыбжьара иҟаз амонологқәа мариамызт", - иҳәоит Ҭемраз. Анаҩс ицәыригоит имонолог хада: Ҭемраз Чамагәуа иара убас дыхәмарит - Тита-Нани "Кьоџьаа рҭыӡшәа" (К. Гольдони. ареж. В. Ақаҩба), Касси - "Иули Цезар" (У. Шекспир. ареж В. Ақаҩба) уҳәа еиуеиԥшым ахаҿсахьақәа.Аибашьраеи уи иацу атематикеи аԥсуа сценаҿыАибашьра атемазы Ҭемраз рацәак иажәа имроуит. Ишиҳәаз ала Ренат Карчаа игәыԥ иалан иҩызцәеи иареи."Еиҿыркаауеит анырҳәа ҳара аҩызцәа уахь ҳаҩны ҳцеит. Аԥшьдәны (Белоречка) ҳганы ҳазыҟарҵон. Акы заҵәык, ҳара ҳазхыҟаз басҳәоит, иаҳхьыԥшны егьырҭгьы царц. Аӡәгьы дымшәарц. Шәара арахь усс ишәымои ҳәа ҳазҳәозгьы ыҟан. Ухы уаиааины убри ашьаҿа узыҟаҵар, иаҵанакуаз рацәан. Ҳара еицыз ҳҟазауаан - Славик Аиба, Омик Ҳагба, Леонид Хышба уҳәа. Ҩынтә ракәу ҳжәылоит ҳәа ҳцеит ҳара ашықәс ҿыц аԥхьа, нас ажәылара мап ацәыркит. Ианвартәи ажәылараҿы Закан Маршьан дҳацәҭахеит. Аԥсра ахы иҭамԥшыз дпоетхом рымҳәои, ари аибашьра ԥышәара дууп. Узакәыҵәҟьоу унардыруеит. Аҟәа ҳцоит, Аҟәа ҳгоит ҳәа ҳгәыӷуан", - аибашьра игәалаиршәоит Ҭемраз.Чамагәуа ирҿиараҿы иаликаауа арольқәа иреиуоуп аибашьра амотив ала иқәыргылоу польшатәи ашәҟәыҩҩы С. Мрожек иҩымҭа "Шьапыла" (ареж. В. Ақаҩба) аспектакль аҿы Аб ихаҿсахьа. Аспектакль аибашьреи уи иацу атрагедиатә хҭысқәеи аанарԥшуеит. Ҭемраз уи атема хымԥада изааигәан: "Ахәыҷы исыцу автор Мрожек иоуп. Аҩбатәи Аџьынџьтәылатәи аибашьраан Мрожек убысҟак ихыҵуан, иаб актәи аибашьра ду далан. Атема бзиан – аибашьра ауаа ирызнауа, ахҵәацәа рҭагылааашьа уҳәа, ҳара иаҳхаҳгаз зегьы аныԥшуеит...", - иҳәоит "Шьапыла" ахҳәаа аҭо.2023 шықәзсазы Аԥсуа тетар ахәаԥшцәа ирыднагалеит Ф. Достоевски ироман "Ауаа ӷарқа" амотив ала В. Симановски ипиеса "Агәхыхҩы" (ареж. А. Ақаҩба) аԥхьарбара. Араҟа агәхыхҩы Макар ироль Ҭемраз инаигӡон. Актиор инубаалон апринццәа ррольқәа ирыцу аромантикатә цәаҩа иԥсабараҿы инханы ишыҟоу. Ари ароль дахцәажәо Ҭемраз иҳәоит: "Ирониала сазнеит ари анагӡара. Уа иаласыгӡеит исхәмархьаз зегьы еизыркәкәаны – салам рысҭон сперсонажцәа зегьы".АкиноҬемраз Чамагәуа ирҿиараҿы акино ҭыԥ дук аманы исгәалашәом, аха арежиссиор Наур Гармелиа ифильм "Аҵыхәтәантәи ахәԥса" анызба, даара иџьасшьеит аибашьра ашьҭахь аус цәгьақәа еиқәзырҽаҽоз Гиа ироль харҭәааны, акыр агәра угаратәы иахьынеигӡаз. Абри азҵааразы Ҭемраз ихәыцрақәа абас иҟоуп: "Акино атәы ҳҳәозар – акамера сара истәым. Епизодқәак рҿы сыхәмархьан, аха рольк нагӡаны акино аҿы сцәырымҵыцызт".Даара иршәыгәны иҟаҵоуп аҭыԥантәи амафиоз ироль, уанхәыҷызтәи "ублатноира" уҳәа узҿыз аелементқәа ухы иаурхәама, сиазҵааит сара аиубилиар."Ааи. Сара санхәыҷыз инаркны убарҭ амҩадууаа здыруан. Урҭ рҟазшьа схәыҷны игәныскылеит, "аблатноира" цәгьа исымбо сыҟан аиашазы. Гиа ироль анагӡараҿы – ахәыҷы ихәмаруаз иоуп исыхәаз. Сара ианакәызаалакгьы исыхәмаруа ибзиарак сашьҭоуп. Ахәыҷы ааӡара дызгарц сҭахымзи. Убри атема сахьынҳалеит сара. Ахәыҷқәа ҳшьырц ҳҭахӡамызт - сҳәоит аҵыхәтәантәи смонолог аҿы. Акино анызба аԥхьа схы кны сдәылҵит. Сара еснагь схы сзахәаԥшӡом авидеонҵамҭақәа рҿы. Наур ҳзакәыҵәҟьаз ааирԥшит аиашазы. Аҩбатәи аан санахәаԥшуаз еиҳа сыԥсы еивгаы сахәаԥшит", - иҳәоит Ҭемраз.Чамагәуа игәаанагарала, арежиссиор ииҭахыз идыруан. Раԥхьа иара Рауль Ақаҩба иихәмарыз ароль ауп идигалаз. Ари са истәымзар ҟалап иҳәеит. Нас, асценари зегь имихын даԥхьеит, уамак ала игәаԥхеит. "Иҭабуп асценари азы сҳәеит, аибашьра ашьҭахьтәи италиатәи анеореализм сгәаланаршәеит сҳәеит. Нас, ҳаицәажәонаҵы иара иӡбеит Гиа ироль сыдигаларц. Ифильм "Ацҳа" сымбаӡацызт. Сыԥҳа ислырбеит, папа, ари дрежиссиоруп лҳәеит", - игәалаиршәоит актиор акинорежиссиори иареи русура шхацыркхаз. Ҭемраз исиҭаз ахҳәаа ашьҭахь, акино ҭызхыз Гармелиа исҭеит азҵаара, уара дышԥалухи абри аҭыԥантәи амафиоз ҟазшьа змаз Гиа ироль азы Ҭемраз Чамагәуа ҳәа. Абар исоуз аҭак: "Сара исыздырӡомызт еиҭашәҳәо "аблатнои" ҟазшьақәа рҭоурых, аха санынеиҿаԥшы, саниацәажәа издырит Гиа ироль дшанаалоз. Иара иҽҭихӡомызт акиноқәа рҿы, аха даара дазыманшәалахеит. Иҵегь иҽҭихыр зеиӷьыҟам киноактиорхоит. Иус ҭакԥхықәрала дазнеиуан, итекст еснагь идыруан, дпрофессионалуп. Асовет актиортә школ бзиа шимоу убоит, даара иазыҟаҵоу актиоруп сҳәар сылшоит. Иҵегь дҭысхырц сҭахуп ҳәарада".Ҭемраз Чамагәуа дҭаацәароуп, иԥшәмаԥҳәыс Марина Наӡаӡеи иареи ирааӡеит хҩык ахшара, ирымоуп хҩык амаҭацәа.Ҳаицәажәара хыркәшо, иухәыцуеи аиубилеи аламҭалазы анысҳәа, Таиф Аџьба ицәаҳәақәа рыла аҭак сиҭеит иахьа 70 шықәса зхыҵуа Ҭемраз Чамагәуа:Сусқәа нелажьны сцароуп аамҭала,Уахь, уаҩ дахьықәым ҭыԥк ахь џьара.Исҭахыуп схыи сареи ҳхала ҳаидхалар,Схала сазхәыцыр закәыҵәҟьоу сара …

https://sputnik-abkhazia.info/20250327/ateatr-sysy-aroup-aktrisa-esma-kyniaa-lytsazhara-1054137810.html

https://sputnik-abkhazia.info/20160506/1018165422.html

2025

Ажәабжьқәа

ab_AB

аналитикеи аиҿцәажәарақәеи, аԥсны, акультура