Аклассика Бедиатәи аныхабаа аҿаԥхьа: "Хьыбла Гьерзмааԥҳа шәаалыԥхьоит..." аҩбатәи аконцерт

Аԥсни Урыстәылеи Жәлар рартистка Хьыбла Гьерзмааԥҳа лфестиваль аҩбатәи аконцерт мҩаԥган Бедиатәи аныхабаа ашҭаҿы.

Аоператә шәаҳәаҩы лыдагьы ахәаԥшцәа рҿаԥхьа иқәгылеит урыстәылатәи аколлектив "Академ квартет", ауарӷанарҳәаҩы Лука Гаделиа, аккордеонист Никита Власов, аконтробасист Васили Андреев.

Акультуратә хҭыс еизнагеит аклассикатә музыка абзиабаҩцәа.

Ахәаԥшцәа ирыдыргалеит адунеитә классика ашедеврқәа рҟынтәи апрограмма - Астор Пиаццолла, Антонин Дворжак, Ханс Циммер уҳәа аҩымҭа дуқәа рҩымҭақәа.

Ари аҭоурыхтә ҭыԥ аҿы афестиваль аконцертқәа хышықәса инеиԥынкыланы имҩаԥысуеит.

Афестиваль ари аҭыԥ аклассикатә музыка иаҭыԥны иҟанаҵоит.

Афестиваль еиуеиԥшым ашықәсқәа рзы иалахәын Хьыбла Гьерзмааԥҳа лҩызцәеи лколлегацәеи - иахьатәи ҳаамҭа амузыкантцәа дуқәа.

Амузыкатә проект аоператә шәаҳәаҩы лҭаацәа ргәалашәара иазкуп.

Афестиваль "Хьыбла Гьерзмааԥҳа шәаалыԥхьоит..." хацыркын 2001 шықәсазы.

Гьерзмааԥҳа илҭахын Аԥсны аклассикатә музыка галарц, зыхьӡ нагоу артистцәа ареспубликахь иаҭааларц.

Аоператә шәаҳәаҩы лыгәҭакы адгылара аиҭеит Аԥсны раԥхьатәи ахада Владислав Арӡынба.

Есԥхынра адунеи аҿы иналукааша аоператә театрқәа рсценақәа зырԥшӡоз Хьыбла Гьерзмааԥҳа афестиваль лыманы Аԥсныҟа аара далагеит.

2014 шықәса рзы афестиваль Аԥсны анҭыҵ имҩаԥган. Аконцертқәа мҩаԥысуан Москва, Вена, Ниу-Иорк, Елена Образцова, Ильдар Абдразаков, Александр Сладковски реиԥш иҟоу артистцәа еизганы.

Жозефина Бумбуриди лгәалашәара иазку афестиваль ахыркәшаратә концерт мҩаԥгахоит нанҳәа 8 рзы, Пицундатәи ауахәамаҿы.

Апрограмма иагәылоуп Кристоф Глиук, Пиотр Чаиковски уҳәа реиԥш иҟоу акомпозиторцәа роператә композициақәа.

Аԥсны ашьҭахь афестиваль артистцәа агастрольқәа рахь ицоит Ханты-Мансииск, Калуга, Тиумен, Курган, Челиабинск, Новосибирск, Екатеринбург, Санкт-Петербург, Вологда.

Апроект нагӡахоит Урыстәыла акультура аминистрреи акультуратә аԥшьгарақәа рзы Урыстәыла ахада ифонди рыцхыраарала.