12 шықәса иалагӡаны, Езаҭ Џьениа аус ицызуеи иареи иуадаҩыз аусура аҟынтә, имариаз атехнологиа ахь ихьаԥшит. Иҟарцо ахыԥхьаӡареи, ахкқәеи рацәоуп аҟнытә иманшәало атехнологиақәа рхы иадырхәоит. Езаҭ Џьениа иусҭарҭа ҳаныныҩнала инаркны иара аҳамҭаҷқәа рыҟаҵашьа амаӡақәа ҳзааиртит.
"Раԥхьаӡа иргыланы идеиак ансызцәырҵлак ашьҭахь снатәаны апластилин ала аԥшынра ҟасҵоит, анаҩсан ашҟә аҵаҳҭәоит, уи ашьҭахь асиликони аформопласти ахархәарала акомпозициа ачаԥашьа шьақәҳаргылоит, уи анаҩс ауп хыԥхьаӡара рацәала асувенирқәа рыҟаҵара напы анаҳаркуа. Ашҟә иалху аилыршьышьы аныҟаҳҵо хылаԥшра аҭахуп, аӡы ашҟә аналырыԥсо ашьшьыҳәа иалырыԥсуеит, ианаҭаху аҷаб алырҭәоит, аформа ашҟә анҭарҭәо ампышҭақәа ҟамларц азы ашьшьыҳәа иҭарҭәоит, аформа аԥырхага аиур аҳамҭаҷқәа ԥхасҭахоит. Ашҟә аншәлак ашьҭахь, аформа иҭыганы, ҷыдалатәи амаруга ахархәарала ԥырхага ахьамоу зегьы ҳрыцқьоит, анаҩсан ашҟә арҩҩаразы 20 сааҭ инарзынапшуа аԥечка иҭаҳҵоит, уи ашьҭахь хынтә иаҳшәуеит, аҵыҳәтәантәи ацәаҳәаҟны ҳанааилак алак ахьаҳшьуеит", — ҳәа шьаҿа-шьаҿала атехнологиа еиҭеиҳәеит аҟаза.
Езаҭ Џьениа иажәақәа рыла, иҟарҵо аалыҵ зегьы ахаҭабзиара аҳаракыраз амаругақәа еигӡаӡом.
Езаҭ Џьениа иусумҭақәа уанрылаԥшуа аҟаза бзиа, зусура ҭакԥхықәралеи бзиабаралеи иазнеиуа инапы ишыҵаҵыз убартә иҟоуп.
