АҞӘА, ԥхынгәы 6 – Sputnik, Бадри Есиава. Апрокуратура хада аверсиала амитинг аан аоппозиционерцәа рхаҭарнакцәеи азинхьчаратә органқәа рхаҭарнакцәеи рыбжьара аҭыԥ аман аимак-аиҿак. Аамҭақәак рышьҭахь аимак иацҵахеит асасааирҭа "Интер-Сухум" аганахь, аисрахьгьы икылибагеит иҳәеит Апрокурор хада.
"Интер-Сухум" ааигәара аиҿахысрақәа ҟалеит. Ихәын: Ахра Џьопуа, Одик Қәчбериа, Астамыр Адлеиба. Урҭ рҟынтәи еиҳа зҭагылазаашьа уашәшәыроу ҳәа дыԥхьаӡоуп Ахра Џьапуа", — иҳәеит Ломиа.
Иааидкыланы ахәышәтәырҭақәа рахь инеиит жәафҩык ауааԥсыра.
Аҩаша, ԥхынгәы хәба рзы аоппозициа аганахьала Аҟәа ақалақь аҟны еизаз дҵаны иқәдыргылон Аҩныҵҟатәи аусқәа рминистр Леонид Ӡаԥшьба имаҵура дамхзарци зыҿҳәара иахыԥахьоу апаспортқәа рыла абжьыҭира азин ҟарҵарци.
Убри инацҵаны дҵаны иқәдыргылон Урыстәыла аҵакырадгьыл аҿгьы ареферендум амҩаԥгаразы абжьыҭирҭа ҭыԥқәа аартхарц.
Атәыла Ахада идҵала Леонид Ӡаԥшьба аусҭҵаарақәа ирҿнаҵы инапынҵақәа рынагӡара аанкылоуп. Абри аамҭазы уи инапынҵақәа неигӡоит аминистр актәи ихаҭыԥуаҩ Борис Абитов.
