АҞӘА, ԥхынҷкәын 7 – Sputnik, Бадри Есиава. Алазертә шоу, агәыҳалалра аимдара, аконцертқәа, азеиԥш џьармыкьа уҳәа ирацәоуп 2018 шықәса иадҳәалоу аныҳәатә уснагӡатәқәа. Абри атәы Sputnik акорреспондент изеиҭеиҳәеит Гагра араион Ахадара аҿар русқәа рзы аилак аиҳабы Алан Макоев.
"Араион Ахадара ашықәс ҿыц азы инарҭбааны аныҳәатә усқәа рымҩаԥгара азыԥхьагәанаҭоит. Ҵыԥх аиԥш имҩаԥысраны иҟоуп алазертә шоу, еиҿкаахоит хәыда-ԥсада ахәыҷқәа ахаа-мыхаақәа ахьырзыршо аџьармыкьа, иаҳҭаараны иҟоуп Аҵаа Бабадуи Асҭыԥҳаи. Еиҳа еиҳабу рзы еиҿкаахоит аконцерт. Иара дискотекала ихыркәшахоит. Ауснагӡатәқәа мҩаԥгахар ауеит ҳәа иазгәаҭоуп ԥхынҷкәын 29-30 рзы" ҳәа еиҭеиҳәоит Макоев.
Иара иазгәеиҭеит агәыҳалалра аимдара ҩынтәуп Гагра иазгәаҳҭоижьҭеи ҳәа. Иара еиҿыркаауеит аҿар русқәа рзы Аилаки аҿартә еиҿкаара "Аԥсҭазаареи".
Ҳәарада Ашықәс ҿыц аԥсаӡ ада ҟалашьа амам, аха иара ахьдыргылаша аҭыԥ макьаназы иалкаам. Макьаназы ҩ-ҭыԥк: асасааирҭа "Абхазиеи" ақалақь ашҭа хадеи ирыбжьаркуеит.
Аконцерт аиҿкаара ахахьы иагеит Акультура аҟәша. Макоев ишиҳәаз ала аконцерт иалахәхоит ашәаҳәаратәи акәашаратәи коллективқәа, ахьыбҿар.
Аныҳәа мҩаԥысраны иҟоуп асааҭ 18:00 инаркны 22:00 рҟынӡа
