АҞӘА, лаҵара 13 - Sputnik. Атуризм аминистрра 2021 шықәсазтәи аԥхынтә сезон аконцепциа "5S", 2030 шықәсанӡа ареспубликаҿ атуризм аҿиара астратегиа апроеки азнархиеит. Аконцепциа ӡыригеит атуризм аминистр Ҭеимураз Хышба.
2030 шықәсанӡа ареспубликаҿ атуризм аҿиара астратегиа макьаназ аус здыруыло проектуп иҳәеит аминистр.
Астратегиа апроект инақәыршәаны иара иаликааит атуризм аҿиараҿы аԥыжәара змоу ахырхарҭақәа:
- Аԥсны арегионалтә лшара азыԥхьагәаҭаны атуристтә комплекс аҿиара
- Адәныҟатә џьармыкьақәа рахь Аԥсны атуристтә аалыҵ алагалара
- Атуристтә маҵзурақәа рхыԥхьаӡареи рхаҭабзиареи реизырҳара
- Анапхгараҭаратә система аиӷьтәра
Иара убасгьы Астратегиа иҳәаақәнаҵо аус хадақәа:
- Анорматив-зинтә база аус адулара
- Зхаҭабзиара ҳараку атуристтә маҵзурақәа аҳәаанырцә тәылауаа рҭахрақәа ирықәшәо аҟаҵара, Аԥсны атурист-реакриациатә конкурентлшара аизырҳара
- Ареспубликаҿы атуризм ҳаамҭазтәи ахкқәеи аформақәеи рырҿиареи рырҿыцреи
- Аԥсны аҭоурых-культуратә ҭынха аларҵәара атуризм алагалара
- Арекреациеи атуризми русхк аҟны жәларбжьаратә усеицура арҭбаара
- Атуристцәа рзинқәа рыхьчареи ршәарҭадара аиҿкаареи
- Акадрқәа рҟазара аиҭазыҟаҵареи разыҟаҵареи ҳаамҭазтәи асистема аиҿкаара
- Атуризм аусхк аҟны анаука-практикатә ҭҵаарақәа рымҩаԥгара
- Аобиектқәа русура хра аманы аҟазаара ахәшьара аҭараз арбагақәа ҳаамҭазтәи асистема ахархәара
- Атуризми арекреациеи русхк аҟны анаплакратә инфраструктура аҿиара адгылара аҭара
- Аинформациатә еиқәыршәара асистема аиӷьтәра, Аԥсны ахьӡ-аԥша бзиа аиҿкаара иазырхо активлатәи аӡыргаратә усура амҩаԥгара.
Аԥхынтәи аԥсшьара аконцепциа 5S хә-еилазаарак рыла ишьақәгылоу комплексуп: амра (sun), амшын (sea), адоуҳа (soul), ашәарҭадара (safety), амаҵзура (service).
S Амшын
Аконцепциа иахәҭаку "амшын" иазыԥхьагәанаҭоит адунеитә стандартқәа ирықәшәо аплиажқәа рреконструкциа апрограмма аус адулара. Аплиажқәа: аекологиа, аԥкырадара, ашәарҭадара, амаҵзура реиԥш иҟоу аҭахрақәа ирықәшәозароуп.
Хышба иажәақәа рыла 2021 шықәсазы агәҭакы ыҟоуп Пицундеи Гагреи астратегиа ҿыц иақәшәо аплиажқәа ҩба раартра.
S Ашәарҭадара
Ашәарҭадарахь иаҵанакуеит антиковидтә уснагӡатәқәа, асабрадатә режим аиқәыршәара, атуризм аусхк аҟны аусуҩцәа рлаҵаҟаҵара. Хазы иазгәаҭоуп амедицинатә цхыраара, аԥгаԥса рыҭара, рзинқәа рыхьчара. Аминистрраҿы иаԥҵоуп аусутә гәыԥ - атуристцәа рыԥсшьараан рзинқәа реилагаразы рырзаҳалқәа аус рыдызуыло. Аусура иалагараны иҟоуп атуристцәа рыдкылара ацифратә форма.
S Амаҵзура
Ҭеимураз Хышба иажәақәа рыла аминистрра аҿаԥхьа иқәгылоу ауснагӡатәқәа ириеуоуп амаҵзура аҩаӡара аҳаракра.
Хара имгакәа аусбарҭа иаланагалоит аотельқәа рхаҭабзиара агәаҭаратә дыргақәа, ацифратә система амаҵзурақәа рхаҭабзиара ахылаԥшразы.
Ацифратә система атуристцәа Урыстәылазегьтәи реидгыла "Lex Priority" апортал аҿы икьыԥхьхьоит.
S Ахырхарҭа ҿыцқәа
Ҭеимураз Хышба иазгәеиҭеит аконцепциа ишазыԥхьагәанаҭо атуризм аҿиара аԥхынразы мацара акәымкәа ашықәс зегьы азы. Уи азы имҩаԥгалатәуп агастрономиатә турқәа аҩы азы афестивальқәа.
"Абҵара 1 - 14 азы иҳагәҭакуп Аҩы агастрономиатә фестиваль амҩаԥгара, Пицунда, аҳәынҭқарратә курорттә комплекс аҿы", - иҳәеит аминистр.
Иара убасгьы Афон ҿыцтәи аҳаԥы аҭаара адагьы уа ацәыргақәҵақәа, аконцертқәа, агьамабаратә уснагӡатәқәа рымҩаԥгара азыԥхьагәаҭоуп.
S Амра
Аконцепциа аҳәаақәа ирҭагӡаны аминистр иӡыригеит аклиенттә хсаалага "Мандарин GO" ахсаалага ацифратә форма зауа атурист, Аԥсны атуризм аусхк аҟны аус зуа анаплакыҩцәа зегьы иҟарҵо амаҵзурақәа рзы аинформациа иоуеит.
