АҞӘА, ԥхынгәы 14 - Sputnik. Аԥсны аҵакыраҿы акриптовалиута арҳаразы аус зуаз 1300 маининг-аппарат аҿыхны иқәгоуп аҵыхәтәантәи ҩымчыбжь рыҩнуҵҟа. Абри атәы аанацҳауеит Аԥсны ААР.
Агәаҭаратә усмҩаԥгатәқәа еицымҩаԥыргоит амилициеи, АШәМ-и, "Амшынеиқәафымцамчи", Аҳәынҭстандарти русзуҩцәа. Ԥхынгәы 1 инаркны иԥшааны иаҿыхуп 1296 маининг-шьақәгыла, дара иҷыдоу ашьҭаҵарҭахь ииагоуп ҳәа азгәаҭоуп адырраҭараҿы.
Гал араион ахатәы ҩнқәа рҟны еиҿкааз хә-криптофермак рыҟны иқәгылаз 89 аппарат аҿыхуп.
Дәрыԥшь ақыҭан иԥшаан 60 маининг-аппарат, Аҳәынҭстандарт аусзуҩцәеи амчратә усбарҭақәа русзуҩцәеи ашьақәгылақәа аҿырхит.
Иара убас Аҟәа иаарԥшуп 27 шьақәгыла, Алада Ешыреи, Тҟәарчали, Гәылрыԥшьи рҟны иааидкыланы иаҿыхуп 41 аппарат.
Ԥхынгәы 12-13 рзы Очамчыра араион аҿы имҩаԥган изакәанымкәа акриптовалиута арҳаразы ишьақәыргылоу амаругақәа рыԥшаареи рымхреи ирызкыз агәаҭарақәа. Очамчыра ақалақьи ақыҭақәаки рҿы иԥшааны ирымырхит 569 аппарат. Гагра араион Алаҳаӡы ақыҭан ирԥшааит акриптовалиута арҳаразы аус зуаз афермақәа ҩба - 474 маининг-аппарат. Гагра араион иԥшаан 16 шьақәгыла.
Акриптовалиута арҳаразы афымцамч закәаншьаҭада зхы иазырхәоз административтә хараԥса рықәырҵеит. Амчратә усбарҭақәа имҩаԥырго изакәанымкәан акриптовалиута арҳара аанкыларазы агәаҭарақәа ирыцырҵалоит.
Аԥсны акриптовалиута арҳареи уи азы ахархәагақәа ралагалареи рзин аанкылоуп 2022 шықәса хәажәкыра 31 рҟынӡа. Аӡбамҭа рыдкылан Аԥсны афымцамч ахархәара ахьацлацәаз иахҟьаны.
