Sputnik амчыбжь: Володин иаара, Урыстәыла Аԥсны ацҳаражәҳәаҩ ҿыц, Аминистрцәа реилатәара
© Sputnik / Томас Тхайцук
Анапаҵаҩра
Ари амчыбжь азы Аԥсны официалла даҭааит Урыстәыла аҳәынҭқарратә Дума ахантәаҩы Виачеслав Володин, Урыстәыла Аԥсны ацҳаражәҳәаҩыс дҟаҵоуп Алхас Кәыҵниа, ареспубликаҿ имҩаԥысит агәыҳалалратә форум "Агәыҳалалратә усқәа раамҭа".
Sputnik
Володин Аԥсныҟа иаара
Урыстәыла Аҳәынҭқарратә Дума аиҳабы Виачеслав Володин аофицалла Аԥсны даҭааит ԥхынҷкәынмза акы азы.
Аԥсны Жәлар реизараҟны Володини аԥсуа депутатцәеи иаркыз реилацәажәара ҩ-сааҭк инеиҳаны имҩаԥысуан. Урыстәыла Аҳәынҭқарратә Думеи Аԥсны Жәлар реизареи рыбжьара аусеицуразы аиқәшаҳаҭра нап аҵаҩын.
Аиԥылара алҵшәақәа рыла Виачеслав Володини Апарламент аиҳабы Лаша Ашәбеи абрифинг мҩаԥыргеит.
Апарламентарицәа еицырзеиԥшу акомиссиа аԥырҵеит, уи аилатәара мызқәак рыҩнуҵҟа имҩаԥгахоит.
Аԥсны ахада Аслан Бжьаниа Урыстәыла Аҳәынҭдума ахантәаҩы Виачеслав Володин диԥылеит. Атәыла ахада инаҵшьны иазгәеиҭеит Виачеслав Володин иаара Аԥсни Урыстәылеи рыжәларқәа ринтересқәа ирықәшәо аусеицура шалнаршо.
Бжьаниа Урыстәыла Афедерациа анапхгара ҭабуп ҳәа реиҳәеит иааиԥмырҟьаӡакәан Аԥсны иазыҟарҵо ацхырааразы. Володин иазгәеиҭеит Аԥсни Урыстәылеи реизыҟазаашьа аҩызаратәи астратегиатәи ҟазшьа шамоу.
Арадио Sputnik аҟны адепутат Левон Галустиан ишеиҭеиҳәаз ала, Володин Аԥсныҟа иаара иабзоураны, иааиуа амчыбжь азы аусутә еилацәажәарақәа рзы ҳтәыла даҭаауеит Аҳәынҭдума атәылахьчареи амилаҭтә шәарҭадареи акомитет ахада Андреи Картополов.
Урыстәыла иҟоу Аԥсны ацҳаражәҳәаҩ ҿыц
Алхас Кәыҵниа Урыстәыла иҟоу Аԥсны ацҳаражәҳәаҩыс дҟаҵоуп Алхас Кәыҵниа. Абри азы Аусԥҟа инапы аҵеиҩит атәыла ахада Аслан Бжьаниа.
"Кәыҵниа Алхас Алықьса-иԥа Урыстәылатәи Афедерациаҟны Аԥсны Аҳәынҭқарра анапынҵа ҷыдақәеи азинмч нагӡеи змоу цҳаражәҳәаҩыс дҟаҵазааит", - аҳәоит Аслан Бжьаниа инапы зҵеиҩыз аусԥҟа.
Кәыҵниа Аԥсны ахада Иусбарҭа анапхгаҩыс дыҟан 2020 шықәса мшаԥы 24 инаркны 2022 шықәса нанҳәа 12 рҟынӡа. Абри аҭыԥ аҿы иара диԥсахит Џьансыхә Нанба.
Уаанӡа ареспублика адипхаҭарнакра дахагылан Игорь Ахба. Ԥхынҷкәын 16 рзы Урыстәыла иҟаз Аԥсны ацҳаражәҳәаҩ Игор Ахба имаҵураҟынтәи ихы дақәиҭтәны, иара Аԥсны Адәныҟатәи аусқәа рминистрра ахаҭарнак ҷыдас дҟаҵоуп евразиатәи аинтеграциа аусхк аҿы. Мадина Аҩӡԥҳа Урыстәылатәи Афедерациаҿы Аԥсны Аҳәынҭқарра аусқәа рзы аамҭалатә гәрагас дҟаҵоуп.
Аминистрцәа реилазаара аилатәара
Абҵара 30 рзы Аминистрцәа реилазаара "Аҳәынҭқарратә информациатә ресурсқәеи адыррақәа рбазеи раԥҵареи рыхьчареи рзы иаку асистема аԥҵаразы" апрограмма аднакылеит. Апрограмма иахықәкуп аҳәынҭқарратә информациатә ресурсқәеи адыррақәа рбазеи раԥҵареи рыхьчареи рзы иаку асистема аԥҵара.
Аԥсны Аминистрцәа Реилазаара Аусԥҟа инақәыршәаны Аԥсны аҵакырадгьыл иахьаҵанакуа аԥсеи аԥсаӡи рыхҵәара азин аанкылоуп, иара убасгьы Урыстәылатәи Афедерациаҟынтәи адац змам аԥса аагара ҟалом. Ақәҵара Аҟәеи ареспублика араионқәа рхадарақәеи ирабжьнагоит аныҳәақәа разгәаҭаразы иԥсабаратәым аԥсаӡқәа ахархәара рырҭарц.
4 Ԥхынҷкәын 2022, 10:50
Иара убасгьы аилатәараҿы акриптовалиута арҳареи амаининг хархәагақәа ареспубликахь ралагалареи рыҿҳәара инахеит 2023 шықәса ԥхынҷкәын 31 аҟынӡа.
Аԥсны Аминистрцәа реилазаара ақәҵара аднакылеит Аԥсни Шьамтәылеи рыхәаахәҭратә хаҭарнакрақәа раартра аус азы Аԥсни Шьамтәылеи реиҳабырақәа рыбжьара аиқәшаҳаҭра анапаҵаҩразы. Ахәаахәҭратә хаҭарнакрақәа Аԥсни Шьамтәылеи рыбжьара ахәаахәҭра-економикатә еимадарақәа рырҿиара иацхраалоит.
Аминистрцәа реилазаара ишьақәнаргылеит 2022-2023 шықәса ҭагалан-аӡынтәи аԥсыӡкраамҭаан акамшьиа шаҟа укыр ҟало акапан, аквота – 35 000 тонна.
"Агәыҳалалратә усқәа раамҭа"
"Агәыҳалалратә усқәа раамҭа" афорум мҩаԥысит Аҟәа. Уи иалахәын арҵаҩцәа, ахәшәтәратә бҩарҵәыра азҟазауаа, ахәыҷтәы хбаҩлашатә дабла чымазара (ДЦП) змоу ахәыҷқәа аус рыдызуло азҟазауаа.
Абҵара 28 инаркны ԥхынҷкәын 2 рҟынӡа урыстәылатәи аҳақьымцәа аныҟәара-еиҭаҵратә аппарат (ОДА) ауадаҩрақәа змоу 6-18 шықәса зхыҵуаз ахәыҷқәа гәарҭеит. Аԥснытәи ареабилитологцәеи асеиԥш иҟоу ахәыҷ чымазцәа змоу аҭаацәарақәеи аус рыцыруит.
Еиҿыркааит Аԥсны иҟоу Россотрудничество Ахаҭарнакра, Аԥсны Агәабзиарахьчара аминистрра, Аҵареи абызшәатә политикеи рминистрра, ахәыҷтәы фонд "Росток", Москва Аҩны. Афорум апартниор хада — Екатерина Клочкова — Урыстәыла иналукааша ахәыҷқәа реиҭашьақәыргылараз аҟазауаҩ.
"Аԥсны-Star" ахынҳәра
"Аԥсны-Star" аԥхьатәи асезон аекранқәа рахь ицәырган жәашықәса раԥхьа. Апроект апродиусер Роланд Бганба иажәақәа рыла, иара иабзоураны аԥсуа естрадахь ицәырҵит Аԥсны аиԥш анҭыҵгьы ақәҿиарақәа аазырԥшыз ашәаҳәаҩцәа ҿыцқәа.
"Аԥсны-Star" ахь алԥшаарақәа мҩаԥысуеит ԥхынҷкәын 15 рзы Аԥснытәи аҳәынҭқарратә филармониаҿ. Иалахәхар зҭаху қәрала 16 шықәса иреиҵамзароуп, ашәак рҳәароуп.
Аԥызацәеи аӡхәцәеи
Иҭыҵит апрофессор Александр Орлов-Кретчмер ишәҟә ҿыц "ВКП(б) аԥызацәеи аӡхәцәеи. 1920-1930-тәи ашықәсқәа раан Кавказ арепрессиақәа рҭоурых".
Ашәҟәаҿы еизгоуп иуникалтәу адокументқәа – 20-30-тәи ашықәсқәа ишьаарҵәыроу рҭоурых. Раԥхьаӡа акәны рыӡбахә ҳәоуп "аԥсуа ҩызцәа рус" аматериалқәа.
"Ари ашәҟәы акәым, уаанӡа ирымбацыз ма ирмаҳацыз илыԥшааху адокументқәа ркаталог ауп ҳәа уҳәар алшоит. Ара иагәылоу адокументқәа хаҭала сара сархивқәа иара убасгьы 20-30-тәи ашықәсқәа рҭоурых документқәа еизызго аколлекционерцәа рархивқәа рҟынтәоуп", - иҳәеит Орлов-Кретчмер.
Ашәҟәы атираж 500 екземплиар иҟоуп. Уажәы ашәҟәы Аԥсныҟа аагаразы аиҿцәажәарақәа мҩаԥыргоит.
Ауаҩӷьычраз аус
Вадим Анқәаб иӷьычразы аус нашьҭуп Гәдоуҭатәи аӡбарҭахь. Ахара ыдырҵоит –Сослан Чачибаиа, Виктор Агәмаа, Тариел Ӷәазаа, Николаи Носов, Роман Барзаниа, Алик Барзаниа, Роман Абӷаџьаа, Африкан Цәышба.
Цәышба иус хазы иалкуп, иара иԥшаараз ишьҭоуп. Носов иԥсихикатә ҭагылазаашьазы ахәшәтәырҭахь днагоуп.
Аусӡбара адыррала 2022 шықәса жәабран 26 азы заанаҵтәи еицәажәарыла Сослан Чачибаиа, Виктор Агәмаа, Тариел Ӷәазаа, Николаи Носов, Роман Барзаниа Анқәаб дӷьычны, Алик Барзаниа иҩнахьы днаган дырҵәахит, иԥа Малхаз Анқәаб 10 миллион мааҭ риҭарц идырҵеит.
Хәажәкыра 10 азы миллионк роуит. Анқәаб Аацы ақыҭаҿ доурышьҭит. Абри ашьҭахь хыхь иарбо ауаа аанкылан.
Аҿҳәара ахыгара
Аслан Бжьаниа Апрокуратура хада анапы ианиҵаз– аҳауатә цәаҳәа "Аҽгәара" арҽеиратә усурақәа рымҩаԥгараана аимҵәарақәа ыҟазу иҟамзу аилкаара аҿҳәарақәа ирнахатәуп ҳәа иҳәеит аилацәажәараҟны Апрокурор хада Адгур Агрба ахада имҩаԥигаз аилацәажәараҿы.
Иара иазгәеиҭеит, абҵара 16 раахыс аиқәшаҳаҭра абжьаҵара иалахәыз аминистррақәеи аусбарҭақәеи рхаҭарнакцәа зегьы ишразҵааз.
"Уажәазы иахәҭаны иҟоу азыҳәақәа ҟаҵоуп, изыхәҭоу аусбарҭақәа рахь аекспертиза нашьҭуп. Агәаҭара амҩаԥгара ахьыуадаҩуи иҭҵаатәу ахьырацәоуи инамаданы иҵекгьы аамҭа рацәа аҭахуп, аха ҿҳәарак ҳзалхуам", - иҳәеит иара.
Аслан Бжьаниа ари аус иааиԥмырҟьаӡакәа ахылаԥшра аҭареи алҵшәақәа рзы адырра ирҭаларци анапынҵа ҟаиҵеит.
Аҵарауаа ҿарақәа II р-Конгресс
Аҭҵаареи аҟазареи рпарк "Сириус" аҟны имҩаԥысуан аҵарауаа ҿарацәа аҩбатәи Рконгресс ԥхынҷкәын 1 инаркны ԥхынҷкәын 3 аҟынӡа. Аҭҵаарадырратә форум еиҿкаан Урыстәыла ахада Владимир Путин иаԥшьигаз аҭҵаареи атехнологиақәеи Ажәашықәса аҳәаақәа ирҭагӡаны.
Афорум алахәылацәа хымш ирылагӡаны иахьатәи ҳаамҭазы аҭҵаара-техникатә ҿиара ахьынӡанагоу ҭырҵаауан, иалахәын астол гьежьқәа, аиҿцәажәарақәа, аилатәарақәа.
Ирылацәажәан аҵара, аҵарауаа ҿарацәа адгылара рыҭара, иԥсабаратәым аинтеллект, амедицина.
Аԥснынтәи ауснагӡатә иалахәын Аԥсуаҭҵааратә институт аусзуҩ, архивист Милана Бжьаниаԥҳа, Аԥсуаҭҵааратә институт аусзуҩ, атоурыхҭҵааҩы Давид Канделаки, Аԥсны иҟоу Россотрудничество аусзуҩ Анжела Ақаҩба.
Аԥсуа музеи аҳамҭа аҭоуп
Асахьаҭыхҩы Баҭал Џьапуа Аԥснытәи аҳәынҭқарратә музеи ашаха аԥага ҳамҭас иаиҭеит. Sputnik зыҿцәажәоз аетнологиа аҟәша иреиҳау аҭҵарадырратә усзуҩ Инга Шамԥҳа илҳәеит ашаха аԥага амаруга XX ашәышықәса иаҵанакуеит, Алада Ешыра инхоз Џыр Аҩӡба иҟаҵамҭоуп ҳәа.
"Узызҿлымҳахаша маҭәаруп. Иара ашахақәа рԥара иазкуп. Џыр Аҩӡба имоҭа- Алмасхан Аҩӡба асахьаҭыхҩы Баҭал Џьапуа ииҭеит. Уи ҳара ҳмузеи ҳамҭас иаиҭеит. Еицырдыруа ҳсахьаҭыхҩы аетнографиатә материалқәа дрызҿлымҳауп, ҳмузеи ахь хәы змаӡам амаҭәарқәа ааигоит", - лҳәеит Шамԥҳа.
Амузеи аусзуҩцәа амаруга аус шауа гәарҭеит. Уи ахархәарала аԥсуаа ашьхарахь ианцоз рхы иадырхәоз ашаха ӷәӷәақәа аларԥон.
Ҭаҭарсҭан ахада Аԥсныҟа иаара
Ҭаҭарсҭан Ареспублика Ахада Русҭам Минниханов ҽнактәи иофициалтәым ныҟәарыла Аԥсны даҭааит. Аслан Бжьаниа аԥсуа-аурыс ҳәааҿы диԥылеит. Минниханов иаара адҳәалоуп аурыс-аԥсуа еизыҟазаашьақәа рҳәаақәа иҭагӡаны ареспубликақәа русеицура.
4 Ԥхынҷкәын 2022, 14:30
Аԥсны ахада Аслан Бжьаниеи Ҭаҭарсҭан Ареспублика Ахада Русҭам Минниханови Гагреи Гәылрыԥшьи араионқәа рҟны аинвесторцәа адзыԥхьалар зылшо аобиектқәа ирҭааит.
Атәыла ахада ипресс-маҵзура ишаанацҳауа ала, Минниханов Аԥсныҟа иаара иахықәкуп-аекономикеи атуризми русхкқәа рҟны аимадарақәа рырӷәӷәара.
