https://sputnik-abkhazia.info/20220327/an-zayk-aanda-uzalashshuam-gogua-iymaa-ryla-aliteraturaaarei-akritikei-1037833505.html

Ҵәҩан заҵәык аанда узалашшуам: Гогәуа иҩымҭақәа рыла алитератураҭҵаареи акритикеи

Ҵәҩан заҵәык аанда узалашшуам: Гогәуа иҩымҭақәа рыла алитератураҭҵаареи акритикеи

Sputnik Аҧсны

Жәлар рышәҟәыҩҩы Алықьса Гогәуа изку анҵамҭақәа рцикл иацҵо, иахьа ишәыдаагалоит алитератураҭҵааҩцәеи акритикцәеи иҩымҭақәа рзы ирҳәахьо Sputnik аколумнист... 27.03.2022, Sputnik Аҧсны

2022-03-27T10:22+0300

2022-03-27T10:22+0300

2023-03-16T10:17+0300

аԥсны

аналитикеи аиҿцәажәарақәеи

https://cdnn1.img.sputnik-abkhazia.info/img/102195/05/1021950574_0:0:1281:721_1920x0_80_0_0_3383dca98ffcb8b5ea8eb185cc1d7078.jpg

Ашәҟәыҩҩы Алықьса Гогәуа ииубилеитә аамаҭа инадҳәаланы анҵамҭақәа санырҿу, зегь реиҳа сгәы еихьызшьуа – ирҿиара анализ азуны литератураҭҵааратә монографиак ахьыҟам ауп. Акызаҵәык, исҳәарц сылшоит иҩымҭақәа рӷьырак еидызкыло ашәҟәқәа 5-томкны 2006 шықәсазы ишҭыҵыз. Хаз-хазы ароманқәеи, ажәабжьқәеи зну аҭыжьымҭақәа ашәҟәыҭирҭақәа рҿы иаҳԥылоит.Алитератураҭҵаареи акритикеиГогәуа иҩымҭақәа реизга актәи атом ахьаауртуа иануп алитератураҭҵаареи акритикеи рзы иазгәаҭақәа. Аибашьра ашьҭахьтәи алитература аҿиаразы Гогәуа аҳасабтәқәа раԥхьа иргыло иреиуоуп: "Иахьа ҳажәа ҳанақәиҭха, ԥаса иҵәахыз аиаша иалхыз асахьаркыратә литература, афилософиа, аҭоурых уҳәа зегьы ҳанрықәиҭха, ашәҟәыҩҩцәа зегьы, ақәра змоугьы, измамгьы, аԥышәа змоугьы, еиҵаны измоугьы – иахьынӡауа, иахьынӡазалшо аамҭа иахҟьаз ҳдилетанизм ҳзаиааиуазар ҳәа аҿыхара ҟаҳҵароуп".Асовет аамҭазы ашәҟәыҩҩцәа зшьаҳауаз акониунктура атәы ҳҳәозар, Таиф Аџьба иҳәан еиԥш, "апартиа амаӡаныҟәгаҩ дызлам" арҿиамҭа лахь арҭон. Ҳара зыӡбахә ҳамоу ашәҟәыҩҩы Алықьса Гогәуа иакәзар, иҩымҭақәа класстә позициала дрызнеиуамызт, џьаргьы иаҳбом ирҿиараҿы аҳра зуаз амчра дахьазышәаҳәо. Уи аҽацәыхьчара агәаӷьра ду аҭахын. Акласстә еизыҟазаашьақәа ирыдҳәалаз асиужетқәа анааирԥшуазгьы, автор иалихуан анхаҩцәа рфилософиа адцәылара астиль. Иаҳҳәап, ароман "Аҽыкәаҳа" аҿы аколнхара анапхгареи анхаҩцәеи реизарақәа данрыхцәажәоз, апартиа аганахь аирониа акәын ихы иаирхәоз: "Уажәы аизара аилашыкьымҭа акәхап. Араион аҟнытә аӡәы дықәгылашт. Нас, ақыҭа аиҳабыра рахьтә – аӡәы. Иҟамчы еиҩырҿа икны, ԥсахра зқәым ақыҭсовет ахантәаҩы иакәхап…". Алитература аилыршәшәара аҭахны избо шәҟәыҩҩуп Гогәуа, аха убри аамҭазы аибашьра ашьҭахь алитератураҭҵаареи акритикеи ахькаԥсаз игәы иалоуп: "Алитературақәа зегьы, иаанымгылакәа иҿиаларц азы, ирҭахуп акритикеи алитераҭураҭҵаареи", - иҳәоит иара, аибашьра ашьҭахь уи зылшаз рацәак аӡәгьы дшимбо ҳардыруа . "Уажәаҟарагьы убри ҳлитература иаҭахны иҟамлацт", "анализ ҟаҵаны ахцәажәарагьы амамижьҭеи акрааҵуеит", "уи аӡәы ихахьы имгар ҟалоит, зегь ҳхы алаҳмырхәуазар", - уҳәа реиԥш иҟоу ахшыҩҵакуа ҳаҵеиҳәоит ашәҟәыҩҩы. Гогәуа ипублицистикатә нҵамҭақәа рҿы дазааҭгылоит акритик Руслан Қапба аҽазышәарақәа шимоу, аха иазгәеиҭоит "ихықәкгьы, иҩышьагьы убас иҟоуп, иарӷьны акәымкәа, автор имаршәа кны, игха ҳәа ииԥхьаӡогьы иҿамкшәа ирбаны дивагылоит" ҳәа. Ажәакала, ашәҟәыҩҩы "иҵегьы иаахтны, иарӷьны ацәажәарагьы аҭахуп" ҳәа иԥхьаӡоит. Аҵаруаҩ Сергеи Зыхәба иакәзар, "Ахәышҭаарамца мыцәарц" захьӡу ишәҟәаҿы иаахтны - "иахьа аԥсуаа ҳҿы алитературатә рҿиаратә хықәкқәа зегь реиҳа акритика еиҵаханы иҟоуп", "ҳлитературатә критика шьаҳиҭхазшәоуп ишыҟоу, имарҭдахеит. Ицагәит уҳәар имаҷцәоуп", - ҳәа ахәыцрақәа ааирԥшуан. Алитератураҭҵаареи акритикеи рыҿиара азҵаара иажәа еснагь иалан Владимир Аҵнариа. Аиашазы, иара дӷьеҩын, дыџьбаран, убри аҟнытә, "аԥсуа литература аҿыц блала аиҭахәаԥшра аҭахуп" иҳәон.Гогәуа ииубилеи аламҭалазы исҭахын сагәылаԥшырц еиуеиԥшым аамҭақәа рзы алитертураҭҵааҩцәа иара изы ирҩыз, ирҳәаз. Ирацәаӡоуп урҭ астатиақәа ҳәа ҳзымҳәозаргьы, асоветтәии аибашьра ашьҭахьтәи аамҭази Гогәуа ирҿиара иазааҭгылаз маҷҩым. Асоветтә анысҳәа, иазгәасҭарц сҭахуп, усҟантәи аамҭазы алитератураҭҵаареи акритикеи рганхь "аҽаҩра шыбзиаз" - Шьалуа Иналиԥа, Шоҭа Салаҟаиа, Владимир Дарсалиа, Владимир Аҵнариа, Артур Аншба уҳәа, еиҵагылаз аҵарауаа рацәаҩын, ҵарадырралагьы иҳаракын, ҳазҭагылоу аамаҭазы ус еиԥш иҟоу аспециалистцәа ҿарацәа рцәаарагьы ыҟамзар ҟалап… "Асовет аамаҭа анеилыҩры, зехьынџьара еилыҩрит уи злеибаркыз аԥҟаррақәа, адоуҳа, акультуразы иаԥызгьы надкылан", - иҳәоит Гогәуа ажәытә аниас, иҿыцу шаҳзышьҭымкааз дазхәыцуа. Асовет аамаҭа аниас, "аидеологиа уажәшьҭа иҟам, хақәиҭрахеит анырҳәа", - ашәҟәыҩҩы иазгәаҭақәа рыла алитература "иагу-иабзоу нҭыцҟьааны иҳәарц аӡәгьы дашьҭам". Гогәуа иазгәеиҭоит ишыбжьаӡыз асахьаркыратә литература "ахәшьара ақәҵаратә система". Ашәҟәыҩҩы хымԥада ихьааигон, адемократиа иаанагаз "ахақәиҭра" зыҩаӡара лаҟәу аҩымҭақәа, акьыԥхьырҭақәеи ашәҟәыҭирҭақәеи "рҟәара иахьықәнажьыз". Аидеологиа рацәацәан ҳҳәозаргьы, асовет аамҭа амакулатура аррацәомызт, зхы иааҭашәо зегь рыграфоманра рҩыҵракны ашәҟәҭыжьырҭақәа иҩнарыжьломызт.Апсихологиатә жанр ашьаҭаркҩыГогәуа раԥхьатәи иажәабжьқәа анцәырҵ инаркны, алитературадырҩцәа деицгәарҭеит. Ашәҟәыҩҩы, аҵарауаҩ Борис Гәыргәлиа "Арҿиаратә хаҿсахьақәа захьӡу истатиаҿы иазгәеиҭоит - "Гогәуа иахьа ҳаԥсуа литература арҿиаҩцәа зегь реиҳа ҳажәлар рмилаҭтә хаҭара аазырԥшуа, иахьрыхьуа, збаҩхатәреи, здырреи, зыуаҩреи рыла изыхьчо шәҟәыҩҩуп" ҳәа. Борис Алмасхан-иԥа инаимҩатәны иҳәоит Гогәуа далкааны иӡбахә анцәыригалакгьы - "уара усгьы аӡә ида, аӡәгьы дубаӡом", - ҳәа аҽԥныҳәа ширҭоз. Гәыргәлиа, азеиԥш хәшьара ашәҟәыҩҩы ирҿиара иаҭо - "уи ифырхацәа ԥсабарала ибзианы ишоу уаауп, ихәыцуеит, игәжәажәоит ауаҩытәыҩса ианаҭаху ибзиабара, ианаҭахыу ицәымӷрагьы рылоуп" иҳәоит. Гогәуа ипсихологиатә романқәеи иповестқәеи адунеи анырба, аԥхьаҩцәа реиԥш, акритикцәагьы далыркааит: 1968 шықәсазы, "Аамҭа ҿыц – ароман ҿыц" захьӡу истатиаҿы, "Аҽыкәаҳа" азы Аҵнариа иҩуан: "1955 шықәсазы аԥсуа литература иаҳнаҭеит "Ахра ашәа", 1966 шықәсазы – "Аҽыкәаҳа". Аԥсуа литература иагәылагылаз егьырҭ апрозатә ҩымҭақәа ирҿырԥшуа, акритик иазгәеиҭоит уахыки-ҽнаки ирыбжьаркуа ахҭысқәа ахьаарԥшу ароман "аинтеллектуалтә ҳаракыра" шамоу. Ароман иаԥхьахьоу ирдыруеит аҩымҭа ахьӡ аллегориатә ҟазшьа шанубаауа, Аҵнариа иверсиа ала "абумеранг еиԥш, еснагь арахь ихынҳәуа, иахьеи уахеи ауаа ргәы иҭыхо азҵаарақәа урыздырхәыцуеит". Гогәуа ироман аамҭала иаҵанакуеит ииасыз ашәышықәса 30 - 50-тәи ашықәсқәа. Аҵнариа аҩымҭа анализ азуа иҳәоит: "Автор мап ацәикит аамҭала, акакала еишьҭаргыланы ахҭысқәа рдәықәҵара", - ари аҩыза ашәҟәыҩҩратә композициа акритик игәаанагарала – "аналитикатә композициа" ахьӡуп. Акритик иазгәеиҭеит иара убас, Гогәуа ароман ахаҿрала, иара ахьӡ "Аҽыкәаҳа" налаҵаны ҳлитература ишалеигалаз егьырҭ атәылақәа рҿы, иаҳҳәап анемец, аиапон, англыз литературақәа рҿы зышьҭа зҳахьаз "асимволикатә-философиатә романқәа" рҟазшьа.Аҵарауаҩ Шоҭа Салаҟаиа "Аҽыкәаҳа иазкны ажәақәак" захьӡу истатиаҿы иазгәеиҭоит: "Аҽыкәаҳа" аҟны иаарԥшуп уахыки ҽнаки рыҩнуҵҟа иҟалаз ахҭысқәа. Аха уи иаанагом, ари арамка дынҭшәаны иҳаҩсхьоу ахьтә аамҭак ҳирбом ҳәа". Анаҩс аҵарауаҩ иациҵоит – "урҭ зегь ҳара иаабоит афырхацәа ргәалашәарала". Салаҟаиа иҳәоит Гогәуа сиужеттә цәаҳәак мацара шалимхуа: "Араҟа иалоу афырхацәа реиҳараҩык дара рхатәы цәаҳәа аанкыланы ицоит". Ари ароман аҿы - "агәаҟрақәа, азалымдарақәа рацәаны ишыҟоугьы", Салаҟаиа аҩымҭа гәкажьганы дахәаԥшуам. Ароман ахьӡ "аҽыкәаҳа зкәыршаз иахатәи амза иаҩызоуп ацәгьа, ахәахәа" - иҳәоит иара аҩымҭа иамоу аллегориатә ҵакы дазхәыцуа. Руслан Қапба "Аԥсадгьыл ԥсыс иахоу" захьӡу истатиаҿы далацәажәоит ароман "Аси амацәыси". Уаҟа аперсонажцәа раарԥшышьа дазхәыцуа Қапба иҩуеит, автор афырхацәа рыԥсҭазаара "абырҵкал икылхны рыҭҵаара еснагь дазҿлымҳауп" ҳәа. Убри аан Қапба иҟаиҵоит азгәаҭа - ареволиуционер Степан Қапба ароман актәи авариант (1963 шықәсазы иҭыҵыз) аҿы иӡбахә ҳәазар, аҩбатәи аҿы ишумбо. Акритик уи акыр иаҭахны дахәаԥшуеит. Қапба игәаанагарала аимпериа аилаҳамҭаз асистема аԥсахра иарҿиаз ароман аҿы "шьардаӡа иацклаԥшуп асахьаркыра ҟазҵо араӡара". Аҵарауаҩ Уасил Аҩӡба, урысшәала иҭыжьу "Абхазский роман" захьӡу ишәҟаҿы иазгәеиҭоит: "Путем ретроспективных событий автор возвращает к событиям махаджирства и показывает многие детали народного быта, его судьбы". Аҩӡба истатиаҿы ҳхьаирԥшуеит Сергеи Зыхәба уи ароман иеиҭаз ахәшьарахь. Зыхәба иазгәеиҭон Гогәуа акымкәа хра злоу атемақәа раарԥшра шилшаз: "Иаликаауеит – ауаҩи ауааи реирызаҟазаашьа, ахатәы бызшәа апроблема, адинхаҵара, асоциалтә классқәа, ахаҵеи аԥҳәыси реизыҟазаашьа…". Аҵарауаҩ Аҩӡба "Асду" азы иазгәаҭақәа рыла автор уаанӡа иҟазшьаҷыдамыз акгьы цәыримгеит, аха убри аамҭазы: "жизнь, воспроизведенная писателем в его романах, представляет собой гораздо более широкую картину исторической действительности" – иҳәоит.Аиумори асатиреи рыла анализ аҟаҵараАҵарауаҩ Владимир Дарсалиа "Иқьачақьцәоума абарҭ мшәагәраа" захьӡу исатаиаҿы, Гогәуа иповест "Мшәагә дуи Мшәагә хәыҷи" уаанӡа иҭыҵхьаз ипсихологиатә романқәа ирҿырԥшны: "Хаҿратә ҟазшьаны иамоуп иуморлеи сатиралеи анализ аҟаҵара, аԥсҭазаартә ҵабырг акомизми, апародиеи, агротески" рхарахәарала иаарԥшуп ҳәа шьақәирӷәӷәоит. Дарсалиа иазгәаҭақәа рыла, ашәҟәыҩҩы ари аповест аҿы ифырхацәа ахәшьара рыҭара азҵаатәы аԥхьаҩцәа иаҳзынижьуеит. Ашәҟәыҩҩы иповест афырхацәа зегьы иҵауланы раарԥшра акәымкәа, еиҳа иаликаауеит мшәагәрааи Қьоуқьаси, "урҭ ганрацәала игәылырҭәааны" раарԥшра илшеит иҳәоит аҵарауаҩ. Асоциалтә еиҟарамрақәа рсахьа ҭыхуа, ари аповест аҿы Гогәуа мшәагәраа рыла иаҳирбоит асистема амаа зку ҵәылхрала ишацрасуа. Дарсалиа иҳәамҭала, мшәагәраа ртематика анхаҩы Қьоуқьас ихьаиршшарц дахьаҿу - "играждантә хдырра иахьынӡахәҭоу иҿианы иахьыҟам автор игәаԥхо иҟамзар акәхап" иҳәоит. Гогәуа иперсонаж хадацәа мшәагәраа, зны-зынла ҳаамҭазтәи "аполитика адырҩцәа" иахьреиԥшугьы убоит. Акритик Дарсалиа ииашангьы иазгәеиҭоит урҭ Гогәуа маҷк иадамзаргьы иҵәылихуеит ҳәа: "Аџьа иацәыхҟьаны ауаажәларратә усура зхы алазгалаз комедиатә хаҿқәоуп" ҳәа. Акритик Дарсалиа игәаанагарала ари аповест аҿы ашәҟәыҩҩы Гогәуа иқәиргылоит имажәӡо азҵаара "дышԥалахәхеи ауаҩы иара иаамҭа, икәша –мыкәша имҩаԥысуа ахҭысқәа?.."Асысымҟаа - ԥсаҭатәысАкритикцәа аӡәымкәа иззаҭгылахьоу жәабжьуп "Асысмҟаа". Аҵнариа илкаақәа рыла, Гогәуа иперсонажцәа - "ифырхаҵарадоу афырхацәа" роуп. Избан ас зиҳәаз акритик? Ашәҟәыҩҩы ирҿиара зегьы улаԥш ахыугар, иубоит иара иааирԥшуа ауаа фырхаҵарала аеҵәа кыдзымԥаац шракәу. "Гогәуа ифырахацәа адәахьтәи рбиографиа дук аинтерес аҵам, урҭ аӡәгьы "ҳауп" ззуҳәаша фырхаҵарак рымпыҵымҟьац" иҳәоит акритик, ашәҟәыҩҩы изы иаабац ауаа рдунеи аарԥшра еиҳа ишыхадоу алкаауа. Гогәуа иҩымҭа еилырго, Аҵнариа дазааҭгылоит ашәҟәыҩҩы иҟазшьа ҷыда ("Асысмҟаа" аҿгьы цәаҳәа хаданы иалсуеит ҳәа ииԥхьаӡо): "Ауаҩи ауааи (аӡәи егьырҭи) реизыҟазаашьа апсихологиатә ҵаҵӷәы аарԥшра". Аҵнариа игәаанагарала - "асоциалтә анализ аасҭа" ашәҟыҩҩы иқәҿио - "ахҭыс аҭоурых акәым, адоуҳа аҭоурых" ауп. "Асысмҟаа" лакәым", - иҳәоит акритик. Уи иаанарԥшуа ахықәкы хадақәа рахь аҵарауаҩ иԥхьаӡоит "ауаҩытәыҩсатә зҵаара дуқәа ирҵарны иқәзыргыло, ирылацәажәо, аибашьраантәи атрагедиатә ԥсҭазаара аҟәыҵәак зыгәра угаша" сахьаркыратә релисттә ҩымҭоуп ҳәа. "Ауаҩ қьиа, ауаҩ бзиа изыҳәан ашәҟәыҩҩы иаԥиҵеит бзиабарала иҭәу абиблиатә символ – "асысмҟаа", аха акритик иазгәаҭала, ауаҩы асысмҟаа еиԥш есқьынагьы "иаҵкьыс ииааиуа дырҿаҵахәханы мацара дзыҟалом". Ари ажәабжь иазкны, акыр абырҵкал икылху алитерататураҭҵаартә дырраҭара зныԥшуа аусумҭа аԥиҵеит Виачеслав Бигәаа, "Ягненок" или "агнец?" захьӡу анализ ҵаула ахьыҟаҵоу аусумҭаҿы. Уи аннотациа ишаҳәо еиԥш, "асысмҟаа асимволтә ҟазшьеи аметафоратә ҟазшьарбақәеи" рыла еибыҭоуп. Аҵарауаҩ иазгәеиҭоит ажәабжь аҿы ишеиҿыбаау "аԥсуа мифологиеи адунеитә мифологиеи". Бигәаа "Асысмҟаа" аҭҵаараҿы акыр хшыҩзышьҭра аиҭоит адинҭҵаара аҟнытә иаауа аилкарақәа Гогәуа ахархәара шриҭо: "Все описание "моления" и "адского двора" глазами мальчика можно представить, как развернутую метафору или развернутый символический образ, раскрывающий определенный мир, который с откровенной наглостью проявляет себя в критической для народа исторической ситуации". Бигәаа иара убас, хшыҩзышьҭра аҳҭаратәы иҳаҵаиҳәоит: "Ягненок" и "агнец" – синонимы, только второе слово встречается в основном в Библии и христианской духовной литературе" ҳәа. Анаҩс, уи машәыршәа ишыҟамлаз дазхәыцуа иҳәоит: "Вряд ли это случайно и не потому что писатель глубоко верующий человек (насколько я знаю, А. Гогуа к таким не отнесешь), он ничего не игнорирует, и даже к атеизму относится нормально, он просто гуманист с широкими взглядами и большим интеллектуальным багажом". Бигәаа иусумҭа акыр иҵаулоу, унадыххыланы иузышьҭымкаауа иреиуазаргьы, ашәҟәыҩҩы ихаҭареи ирҿиаратә дунеии иҷыдоу блала ҳахәанарԥшуеит.Аимак - аиҿакАҵарауаҩ Шьалуа Инал-иԥа - "Ажәа хәыҷык жәабжь дук азы" захьӡу истатиаҿы зынӡагьы дақәшаҳаҭым Гогәуа апсихологиатә портрет аарԥшраҿы арҵаҩы димамзыт ҳәа ицәырҵхьаз агәаанагара. Алитератураҭҵааҩ Артур Аншба илитературатә теориала акәзар - "апсихологиатә жанр дашьаҭаркҩуп Гогәуа" иҳәон. "Атәым жәҩан аҵаҟа" Д. Гәлиа, "Акаруал шәақь" Иван Папасқьыр уҳәа егьырҭ аԥсуа жәабжьқәа раԥҵаҩцәа иара ирҵаҩцәа ракәын. Ҵәҩан заҵәык аанда узалашшуам", - иҳәоит Инал-иԥа абарҭ ахәыцрақәа аҿаԥҽуа. Артур Аншба иҩуан Инал-иԥа дзыргәамҵыз агәаанагара: "До А. Гогуа в абхазской литературе не было психологического анализа и портретной характеристики. Они встречаются только в произведениях А. Гогуа...". Инал-иԥа истатиа иаԥхьо ибоит, усҟан аҩымҭақәа анҭыҵуаз, аимак-аиҿак шырхылҵуаз, иахьа иаҳамбо алитература иазку аилыргарақәа шымҩаԥысуаз. Ҳаамҭазтәи аҭҵааҩы Виачеслав Бигәаа, Инал-иԥа игәаанагара иациҵошәа шубогьы, сгәанала зегь акоуп Гогәуа апсихологиатә проза ацәырҵра дасимволны ибоит: "С именем Алексея Гогуа связано развитие и утверждение психологической прозы в абхазской литературе второй половины XX века, зачатки которой были заложены в произведениях Д. И. Гулиа ("Под чужим небом", "Камачич"), И. Г. Папаскира ("Темыр", "Женская честь") и др.". Бигәаа ҿырԥштәыс иааигоит Гогәуа аԥсуа литератураҿы ҟазшьа ҷыдас имоу шаликаахьаз аурыс критик Вадим Кожиновгьы: "Писатель сумел слить воедино стилевые искания новейшей мировой прозы и самобытные традиции абхазской народной культуры". Бигәаа иҭҵаамҭаҿы ишьақәирӷәӷәоит агәаанагра – Гогәуа, Достоевки нас, Фолкнери реиԥш хықәкыс ишимоу ауаҩы иеилкаара, ипсихологиа аарԥшра, насгьы "ауаҩы еснагь еилагьежьуа адунеи дшазыҟоу". Ашәҟәыҩҩы Фазиль Искандер иакәзар, акыр шықәса раԥхьа Аншба иазгәаҭақәа ирышьашәалоу ахәыцрақәа ааирԥшит: "Первые рассказы и стихи абхазских писателей шли от этих устных повествований и были, конечно, близкими по форме, то есть эпичны". Анаҩс, Искандер аиубилиар алитеатура иалеигалаз ажанр абас ахиҳәаауеит: "С появлением в печати первых его вещей стало ясно, что в абхазскую литературу пришел писатель с явно выраженной новаторской тенденцией".Аҵарауааи ашәҟәыҩҩцәеи Гогәуа ирҿиара акыр иазааҭгылазаргьы, иуадаҩуп иара иганахь акритикатә цәаҳәақәа рыԥшаара. Алитератураҭҵаареи акритикеи рҿиартә ҟазароуп, уи аԥхьаҩ ахшыҩҵакқәа рышьҭкаараҿы ицхраауеит. Иахьа зиубилеи азгәаҳҭо Алықьса Гогәуа ирҿиара аҭҵаара аринахыс знапы ианыло рзы, иҟоуп кьыс змам арҿиаратә мхурсҭақәа. Афилологцәа қәыԥшцәа рзы зеиӷьыҟам темақәоуп ашәҟәыҩҩы ибызшәа аҷыдарақәа инадыркны, прозатә формала иҩу ипоезиа аҭҵаареи, аибашьра ҟалаанӡатәии уи ашьҭахьтәии иҩымҭақәа еиҿыбааны рыхцәажәареи. Даҽакала иаҳҳәозар, ҵҩа змаӡам атемақәа ԥшуп.

https://sputnik-abkhazia.info/20220319/iaiaaiz-arevoliutsia-diktaturakhoit-alysa-gogua-ipublitsistika-iazkny-1037833423.html

https://sputnik-abkhazia.info/20220315/zyriarala-akha-dzyrgyro--aa-iazgareit-alysa-gogua-iubilei--1038133653.html

https://sputnik-abkhazia.info/20220315/1038129401.html

https://sputnik-abkhazia.info/20220315/aproza-inynago-apoezia-asua-literatura-aklassik-alysa-gogua-90-shysa-ikhyit-1037833230.html

https://sputnik-abkhazia.info/20220306/azhlar-rzy-ikhyragakhaz-alysa-gogua-itsazhara-1037893407.html

https://sputnik-abkhazia.info/20210308/Abziabara-anasy-arazydara-asa-rlakhynaa-Alysa-Gogua-iprozay-1031957898.html

https://sputnik-abkhazia.info/20200704/-Sara-isakhu-iara-iazdyram-iara-iaakhu-sara-isyzdyram----Alysa-Gogua-1030471217.html

https://sputnik-abkhazia.info/20220315/argyna-alysa-gogua-iymaa-rzy-dara-zegy-ma-ateatr-ianaaloit-ma-akino--1038121742.html

https://sputnik-abkhazia.info/20220301/amatsys-agama-zkhysyz-1037833179.html

https://sputnik-abkhazia.info/20220305/asny-eitsyrdyrua-akhya-akhsalba-alysa-gogua-iazara-aydara-iazkny--1037902587.html

2022

Ажәабжьқәа

ab_AB

аналитикеи аиҿцәажәарақәеи